“قاعد من الشغل وعاوز أصرف عليه”..سيدة تشتكي وتطلب الطلاق

كتب -أسماء سرور

رفعت السيدة:” منال.ك” 35 سنة دعوى طلاق للضرر بسبب عدم عمل زوجها ومطالبتها بالنفقة عليه وعلى بناته من زوجة سابقة.

وقفت منال أمام محكمة الأسرة وقالت:” أنا اتجوزت متأخر الكل قال هيفوتك قطر الجواز كان عندى 32 سنة ولكن كنت بصرف على نفسى وكنت عايشة مرتاحة ولكن أخواتى وأمى كانوا عاوزين يفرحوا وخلاص ولما اتقدم جوزى كان مطلق ومعاه بنتين قالوا اكسبى فيهم ثواب وربيهم معاكى وافقت وكنت مضايقة بس قولت اتجوز وخلاص وهو مجبش أى حاجة وانا كملت الباقى من الشقة واتجوزنا.

وأضافت منال:” بعد شهر جواز فاجئنى أنه مش بيشتغل وأنه عليه ديون ومحتاج أسدها لحد ما ينزل يلاقى شغل وافقت عشان أكيد مش هبدأ حياتى بمشاكل ولكن اتفاجئت أن كل حاجة أنا شيلاها وشهر بيجيب شهر لحد ما عدى 3 سنين استنزفنى فيهم وخد كل اللى معايا وبقى المرتب بتاعى بيصرف بيه على البيت وعلى بناته كمان لحد ما جالى دور تعب شديد وقالى روحى اقعدى عند اهلك لحد ما تخفى روحت لأهلى وقررت مرجعش تانى،طلبت الطلاق رفض بشدة قررت أرفع طلاق للضرر”.

وقبلت المحكمة الدعوى ولم تصدر حكمها حتى الآن.