من أروقة محكمة الأسرة..سيدة تطلب الخلع بسبب غريب

كتب -أسماء سرور

” اتفق مع أهلى نتجوز وأكمل تعليمى ولكن خلف كل الوعود ورفض إنى أحضر الإمتحانات” هكذا بدأت “هنا. 22 سنة” كلامها فى محكمة الأسرة.

رفض الأهل

وقفت هنا أمام محكمة الأسرة وقالت:” انا اتجوزت جوزى عن حب ووقفت قدام أهلى عشان نتخطب لأنى كنت بحبه جدا وشايفة أنه أحسن راجل فى الدنيا كلها وهو كان مبين أنه بيحبنى ومستعد يقف قدام الكل عشانى وفعلا اتقدم وحصل مشاكل كتير ولكن فى الأخر اتخطبنا”.

أكملت هنا وقالت:” الخطوبة كانت كلها مشاكل ولكن عاندت وقولت بحبه وهاخده،أهله مكنوش بيكلمونى خالص لدرجة حماتى بعتتلى تقولى بدعى ربنا انك متدخليش بيتنا ولكنى تجاهلت كل الإشارات دى وكملت فى الجوازة”

انتهاء الحب

تابعت هنا بحزن وقالت:”اتجوزنا للأسف فى بيت أهله وكنت فاكرة أنه زى ما وعدنى مليش علاقة بيهم ولكن اللى حصل أن حماتى كانت بتدخل فى كل. كبيرة وصغيرة تخصنى ومكنتش بقدر اروح لأهلى لأنه كان اختيارى من الأول”.

أضافت هنا وقالت:” حصلت مشكلة صغيرة بينى وبين حماتى حلفت ما هدخل امتحان ولا هنجح طول ما انا متجوزة ابنها قولت أكيد بتهددنى ولكن اللى حصل أنها قدرت تقنع أبنها يحبسنى فى البيت وياخد بطاقتى ويحرمنى من دخول الامتحانات وخسارتى للسنة،لحد ما قدرت اتصل بأخويا واهلى خدونى ورفعت خلع لاستحالة العشرة بينا.

وقبلت المحكمة الدعوى ولم تصدر حكمها حتى الآن.