من اروقة محكمة الأسرة..سيدة فى دعوى الطلاق: “يريد الاستيلاء على ذهبى لمساعدة أخوه”

كتب -أسماء سرور

“يريد الاستيلاء على ذهبى الذى أهدانى به أهلى فى مناسبات مختلفة لمساعدة أخوه”، هكذا بدأت يارا30 سنة كلامها داخل محكمة الأسرة ..ياترى إية الحكاية؟.

بيت العيلة

وقفت يارا تحكى حكايتها أمام المحكمة وقالت:” أنا متجوزة من 11 سنة فى بلد ارياف ماشين بنظام بيت العيلة، بمعنى إنى غير مسموح أنى أطبخ فى شقتى أو يكون ليا مصروف خاص الكل بيشتغل ويحط كل الفلوس فى إيد حماتى هى المسئولة عن كل حاجة حتى حمايا بيعمل كدة، كنت متخيلة أن الحياة هتكون سهلة مكنتش أعرف إنى داخله الجحيم برجلى،من مشاكل للسلايف وتحكم الحماة”.

واكملت يارا” :أنا كنت فى بيت أهلى بدلع وبصحى براحتى وأنام براحتى مكنتش واخدة على شغل البيت الكتير لحد ما اتجوزت وشوفت العذاب هناك،كانت حماتى بتصحينى من بعد الفجر ولما لاقيت أن مفيش مخرج كنت بصرف امورى وحاولت اتأقلم مع الوضع”.

حادثة الزوج

تابعت يارا كلامها وقالت:” حماتى كانت بتاخد كل الفلوس لحد ما جوزى عمل حادثة مكنش معانا أى فلوس على جنب اضطريت أبيع شبكتى كلها عشان نصرف على علاجه والدكاترة لحد ما يقف على رجله تانى واستمر الوضع دة سنة كاملة محدش فكر يساعدنا ابدا وزعلت منهم وقررت أخد جنب واتعزلت بعد 6 سنين جواز”.

وأضافت يارا” مرت السنين واتفاجئت بجوزى عاوز ياخد دهب أهلى اشتروه ليا فى مناسبات مختلفة من أيام ما كنت طفلة وهو معدى 100 جرام،جوزى عاوز يستولى عليه عشان يساعد أخوه فى جواز بنته ،رفضت بشدة بسبب عدم وقفتهم معانا فى الظروف اللى فاتت ولكن جوزى أصر لذلك غضبت عند أهلى وطلبت الطلاق رفض ورفض يبعت أى مصاريف لعياله،رفعت طلاق للضرر ونفقة للصغار.

وقبلت المحكمة الدعوى ولم تصدر حكمها حتى الآن.