من دفاتر محكمة الأسرة.. سيدة تشتكى:”بيساومنى على مصاريف الطلاق”

كتب -أسماء سرور

“قالى عاوزة تطلقى اتنازلى عن كل حقوقك وادفعى مصاريف المأذون” هكذا بدأت “سماح .28 سنة” كلامها فى قاعة المحكمة.

أسباب الخلاف

وقفت سماح أمام محكمة الأسرة وقالت:” احنا متفقين اننا مش هنكمل مع بعض ولكن هو عاوز يخرج بأقل الخسائر الممكنة ومش عاوز يدفع حاجة،أنا متجوزة من 6 سنين ومعايا بنت واحدة تقريبا أنا اللى بتحمل كل مصاريفها كلها ومصاريفى الشخصية هو قال أنه مش ملزم بيها ودة كان سبب الخلافات بينا”.

وتابعت سماح:” أنا تعبت المسئولية ولما حصلت مشاكل فى الشغل عندى وكنت مضطرة أقعد كنت فاكرة أنه ممكن يقف معايا زى أى راجل بيحب مراته ولكن العكس حصل لما طلب منى ارجع الشغل تانى حتى وأنا مش غلطانة رفضت اتحول فى معاملته معايا وبقى عصبى ومش عاوز يصرف على البيت”.

إتفاق الطلاق

أكملت سماح بعيون دامعة وقالت:” حصل مشادة بينا اتفاجئت برد فعله أنه ساب البيت من غير فلوس وراح قعد عند أهله وانا كنت بحاول أمشى نفسى على أد ما اقدر لحد ما التقى شغل تانى ولما الحالة بقت صعبة روحت ليه عند أهله وقولتله أن الوضع دة مش هينفع يستمر قال انزلى اشتغلى وأنا ارجع يإما كل واحد يروح لحاله قولتله ياريت وكانت المفاجأة”.

اكملت سماح:” قالىعاوزة تطلقى ادفعى فلوس المأذون واتنازلى عن كل حقوقك وأنا أطلق،خرجت من عنده مصدومة وقررت طالما هصرف على نفسى يبقى اطلق منه وأخد كل حقوقى رفعت عليه قضية طلاق للضرر”.

وحكمت المحكمة بالطلاق طلقة بائنة وإلزام الزوج بكافة النفقات.