هند في دعوى خلع: أعمال المنزل لا تناسبني
كتب – أسماء سرور
حضرت”هند.27 سنة” برفقة محاميها جلسة الخلع التى رفعتها على زوجها لعدم قدرتها على عمل أعمال الشقة.. فما تفاصيل الحكاية؟
حب الجامعة
وقفت هند أمام محكمة الأسرة لتروي قصتها قائلة:” أنا كنت فى جامعة خاصة كبيرة وهو كان فى جامعة حكومة وتقابلنا فى ايفنت “مناسبة” وقعدنا نتكلم وكان فى تواصل على طول واعجبنا ببعض وللأسف حبيته، مكنتش فاهمة أبعاد الموضوع وفرق الطبقات وقتها وإنى هتعب كدة فى حياتى”.
وتابعت:” اتخطبنا وبابا مكنش موافق على الجواز ولكن مقدرش يقف قدام اختيارى وقال انتى حرة فى حياتك، طبعا جبت شبكة أقل كتير من أى واحدة فى العيلة عندى بتجيبها وقولت أهم حاجة أكون مع اللى بحبه، وهو بدأ يجهز شقته اللى كانت فى مكان شعبى بعيدا عن المكان اللى كنت عايشة فيه ووافقت عليها وتم الجواز”.
من يقوم بمهام المنزل؟
أكملت هند كلامها وقالت:” من بعد ما اتجوزنا قولتله هرجع الشغل رفض وقال تقعدى فى البيت وأنا بزهق على طول، اتفاجئت بيه بيطلب منى إنى انضف وأعمل شغل البيت وأنا كمت فى بيت أهلى الأكل بيجى لحد السرير”.
وتستكمل: “رفضت طبعا وقولت تجيب واحدة تخدمنى قال الظروف متسمحش وانسى عيشة أهلك إحنا بنبدأ حياتنا مع بعض، بصراحة مقدرتش أعيش أكتر من شهرين فى المستوى دة ورجعت لبابا طلبت منه أنه يطلقنى، فعلا بابا كلمه أننا نطلق رفض تماما وقال أنه بيحبنى ولكن انا مش قادرة أكمل معاه واضطريت أرفع خلع”.
وقبلت المحكمة الدعوى ولم تصدر حكمها حتى الآن.
