التنمر خرب البيت..سيدة تطلب الخلع بسبب أفعال زوجها

كتب -أسماء سرور

رفعت السيدة “رحاب .ك “34 سنة دعوى خلع على زوجها بسبب تنمره على شكلها وإعاقتها بصورة مستمرة.

وقفت رحاب أمام محكمة الأسرة وقالت :”أنا متجوزة من سنة واحدة وعندى إعاقة فى رجلى ولكن مش ظاهرة أوى وهو عارف بيها من البداية من ساعة ما اتقدم ليا،وعشان سنى كبير أهلى عملوا الخطوبة شهرين وتتموا الجواز عشان ألحق أخلف بسرعة”.

وأضافت:” طبعا كنت معترضة على عدم شغله ولكن أمه قالت هيشتغل وهيسافر بره مصر بعد الجواز واحنا معاه هنسنده ،اتفاجئت بعد الجواز إنى شايلة كل المسئولية وهو مش بيشتغل وقولت مش مشكلة، لكن كان عندى أزمة معاه أنه دايما يتنمر على شكلى وعلى مشيتى ودة كان بيجرحنى وكان بيقول “أنه بيتكسف يمشى معايا عشان الناس بتقول إنى أمه” مع أن شكلى صغير عنه كتير وهو مكنش شايف كدة واتكرر الموقف دة أكتر من مرة لحد ما طلبت الطلاق هنا كانت الصدمة قال تدفعى كام وأطلقك ما انا لازم أستفيد من الجوازة دى،ساعتها أتاكدت أنه اتجوزنى طمعان فى فلوسى وقررت أخلعه”.

وحكمت المحكمة بالخلع والطلاق طلقة بائنة.