خطيبي طلب بعد الجواز أعيش مع أهله..فتاة تشتكي

كتب -أسماء سرور

أرسلت إلى مولاتى الفتاة “ك.م “23 سنة تشتكى من خطيبها وقالت أنا مخطوبة من سنتين عن حب هو قريبى من بعيد وكنت بحبه قبل الخطوبة وعلاقتنا كويسة جدا .

وأضافت:” خطيبى بيسافر شهر ويرجع شهر هو دة نظام شغله وإحنا عندنا شقة فى المدن الجديدة بعيد عن أهلى وأهله لاقيته بيقول لما أسافر تقفلى الشقة وتروحى تعيشى مع أمى اعترضت لأنه عنده اخوات شباب وأخت منفصلة وأولادها كدة مش هاخد راحتى ،زعل منى وقعد فترة ميتكلمش معايا وبعدين كلمنى بيقترح عليا أقتراح تانى” .

وأكملت:” لاقيته بيقول خلاص أنا لاقيت الحل أن أختى تيجى بعيالها تعيش معاكى فكرى وردى عليا شوفى عاوزة ايه وأنا محتارة بجد اوافق ولا أرفض” .

رد مولاتى

أرى عزيزتى أن كلام خطيبك لا يجب القبول به أبدا أولا لإحترام خصوصيتك وخصوصية أهله ،فى الإقتراح الأول سيفرضك عليهم وفى الإقتراح الثانى سيفرض أخته عليك.

ويجب أن يتفهم خطيبك ان الزواج إستقلال بالحياة واستقرار،وفى حال صمم على موقفه يجب أن يتدخل أهلك حتى تضعى النقاط على الحروف .

ووجود أخته فى منزلك بأطفالها سيسبب لك المشاكل الكثيرة وسيحدث الكثير من المشاكل بينكم لذا يجب أن يكون وجودك فى منزلهم ضيفة ،وإن كان الطلب من باب الخدمة فأخته اولى بخدمة أمه .