داخل أروقة محكمة الأسرة..دعوى طلاق بسبب سوء المعاملة

كتب -أسماء سرور

يقوم الزواج على مبدأ التراحم والمودة بين الزوجين وأن يحفظ الزوج حق زوجته ويعاملها بكل إحترام مثلما كانت تُعامل فى بيت أهلها،ماذا لو وجدت الزوجة غير هذة المعاملة ماذا تفعل؟

تقول”نبيلة.25″ إنها قررت رفع طلاق للضرر بعد 6 سنوات عذاب ضاعت فيهم صحتها وزهرة شبابها وأصبحت تكره الزواج وبيت العيلة.

تحكمات الحماة

قالت نبيلة بعيون دامعة: “أنا اتخطبت زى أى بنت كنت طايرة من الفرح وكانت حماتى بتضايقنى بالكلام ولكن خطيبى كان بيقولى ماما صريحة شوية وبتحب الهزار متقصدش وكنت بعدى،كان ما بين عيلتى وعيلته زيارات كانت تعلق على الزيارة اللى داخلين بيها، وماما تقول معلش لحد ما جه عيد الأم هو جاب عباية وشنطة لماما وانا جبت نفس الهدية كلمتنى وطلبت خاتم دهب عشان دى قيمتها وساعتها خطيبى ساعدنى وانا كنت محوشة مبلغ على جنب وجبته عشان أراضيها معرفش أن دى بداية التنازلات،جه وقت التجهيز للفرح ادخلت فى كل حاجة وعملتها على مزاجها هيا وكنت بعدى عشان بحبه لحد ما تم الفرح”.

المعاملة السيئة

اكملت نبيلة حكايتها وقالت:” اتجوزت وبعد شهر قالت هو مفيش حمل ليه وخدتنى روحنا للدكتورة اللى استغربت من كلامها وبعدها ربنا كرمنى وحملت وأنا حامل كانت تخلينى أمسح الشقة مرتين فى الأسبوع وامسح السلم من فوق لتحت غير شغل الشقة كله بعمله وبناتها نايمين ولما أقول تعبت ترد تقول انتى هتساوى نفسك ببناتى وتحصل مشاكل وجوزى مكنش لسه رأى، عدت السنين وأنا فى العذاب دة لحد ما جبت ابنى التانى مكنتش قادرة لا انزل ولا أطلع مع الأنيميا اللى عندى التعب زاد عليا وهيا مفيش رحمة،استمر الوضع أنا بخدم وهيا بتتحكم فيا لحد ما كنت بمسح وقعت جامد على ضهرى تقولى قومى كفاية تمثيل وانا بعيط قدامها مكنتش قادرة اتحرك لحد ما جوزى جه خدنى للدكتور وقال ممنوعة من الحركة،هيا قالت حتى لو جبتيلى مين لازم تعملى اللى عليكى كلمت أهلى وعملوا قاعدة حضرتها وقالت لو مش أد الجواز تقول ونجوز ابنى وملهاش حاجة عندنا،لجأت للمحاكم عشان أخد حقى وحق عيالى.

وحكمت المحكمة بالطلاق طلقة بائنة وإلزام الزوج بكافة النفقات.