ريهام سعيد تثير الجدل.. قصة زواجها بمحمد هنيدي.. اعرف الحكاية
كتب- ندى أشرف
حالة من الجدل أثارتها الإعلامية ريهام سعيد، بعد تصريحاتها الساعات الماضية وكشف أسرار جديدة في حياتها الشخصية، خلال لقائها في برنامج “كتاب الشهرة”.
كشفت الإعلامية ريهام سعيد، عن قصة قديمة لها مع الفنان محمد هنيدي، وهى أنه كان تقدم للزواج منها لكن أسرتها رفضته خوفا من مجال الفن عليها.
وقالت ريهام سعيد: “اتقدملي فنان من الفنانين ووالدتي رفضت، ودي أول مرة أقولها في حياتي محدش يعرف ده نهائي”.
وتابعت ريهام سعيد: “هو محمد هنيدي، أنا أهلي موافقوش عشان هو ممثل كانوا خايفين ياخدني معاه في التمثيل وهما بيخافوا ومش بيحبوا مجال الفن نهائي “.
وحول كيفية تعرفها بالفنان محمد هنيدي قالت ريهام سعيد: “كنت صغيرة في الجامعة الأمريكية كنت 19 سنة مثلا في أول سنة في الجامعة، وطلبوا مننا أن نعمل لقاء مع ممثلين وأنا كنت بحب مسرحية حزمني يا رحت المسرح عشان أعمل انترفيو مع أي حد، مين اللي رضي يعمل معايا كان محمد هنيدي”.
وأكملت ريهام سعيد: “رحت وقفت على باب المسرح أنا وواحدة صاحبتي هي رولين القاسم، كان المساعد بتاعه اسمه جودة طلبت منه أن ندخل نعمل انترفيو، عرفت بعدها أنه أعجب بيا لما كلمني وقالي إنه عايز يتقدم ليا وأنا فرحت جدا هو نجم وكان عامل فيلم إسماعيلية رايح جاي ومكسر الدنيا”.
وأضافت ريهام سعيد: “جيه على البيت وكان جايب هدايا كتير أوي كان لسه راجع من أمريكا، مامتي قالت له هنفكر، وبهدلتني أنا، بالنسبة لأمي المجال دا سمعته سيئة هتأخر برا وممكن حد يبوسني في فيلم، ورفضت”.
