زوجة تخلع زوجها..كلمة السر “صاحبة عمرها”

كتب -أسماء سرور

رفعت السيدة “جنى .م” 28 سنةدعوى خلع على زوجها بسبب زواجه العرفى من صديقة عمرها التى كانت تشتكى لها كل مشاكلها .

وقفت السيدة جنى، وقالت:” أنا متزوجة من 4 سنين من جوزى حب عمرى أعرفه من 10 سنين وكانت قصة الحب بينا يشهد عليها كل الناس وخصوصا صاحبة عمرى اللى عارفة أد ايه تعبنا عشان نتجوز”.

وأضافت السيدة:” جوزى كان دايما يقول مش مرتاح ليها وانا كنت بقوله مستحيل أسيبها دى أقرب ليا من أخواتى وكانت بتيجى عندى الشقة وهو مسافر وتبات معايا ،وكنت بسيب ابنى معاها وأنزل الشغل من كتر ما كنت واثقة فيها” .

وأكملت” انا شكيت فيها لما لاقيتها عارفة حاجات أنا كنت لسه هحكيها ليها بدأت أركز معاها أنها بقالى 6 شهور بتغيب وكل ما أكلمها تقولى مشغولة أو مفيش شبكة ودة كان شغل جوزى فى مكان مفيش فيه شبكة كويسةوفى نفس الوقت جوزى مبقاش يتكلم عنها ويحاول يحذرنى منها ،لحد ما مسكت الفون بتاعه وبدأت أدور كتير لحد ما لاقيت رسايل مخفيه بينها وبينه على الواتس لاقيت جريمة خيانة كاملة ،سيبت البيت وروحت عند أهلى من غير ما أتكلم ولما أتصل قولتله طلقنى مش هينفع تجمع بينى وبينها رفض الطلاق ،رفعت عليه خلع” .

قبلت المحكمة الدعوى ولم تصدر حكمها حتى الآن.