زوجة ترفع طلاق للضرر بسبب “خسارة حملها”

كتب -أسماء سرور

رفعت “حنان .م” 26 سنة طلاق للضرر بعد 11 شهر زواج بسبب ضرب زوجها المبرح لها.

وقفت حنان أمام محكمة الأسرة مطالبة بالطلاق وقالت:” انا تزوجت لمدة 11 شهر ضربنى فيهم ضرب مبرح وعذبنى عذاب عمرى ما شوفته لدرجة أن خسرت حملى وكان عاوز يمضينى على تنازل عن قايمتى بالإكراه”.

وأضافت حنان:” بدأ بضربى رابع يوم زواج بسبب هزار فقط لاقيته بيمد أيده وبعدها جه صالحنى وقال إنى أتحمله ولازم أكون بنت أصول ،أتكرر ضربه ليا فى كل مشكلة ولما كنت بشتكى لأمى كانت بتقول طبع الرجالة كلهم كدة قولت أسكت وأعيش ،بعدها حملت وقولت حالما هتعدل أكيد مش هيضربنى وأنا حامل ودة فعلا اللى عمله لحد أخر مشكلة ولكن كان بيعاقبنى عقاب من نوع تانى كان بيحرمنى من الأكل والحمام وكان بيذلنى ويحبسنى فى الأوضة يومين أقعد أتوسل إليه يخرجنى ،حاولت أطلق منه كان بيرفض ويقولى الموضوع دة بموتك أنا عمرى ما أطلقك “.

واستكملت حنان:” اتخانقنا خناقة عادية أنا بحاول أتجنب أصلا إنى أشد قدامه لاقيته بيضربنى ضرب موت لحد ما سقط اتصلت بأهلى لحقونى فى المستشفى كنت هموت فعلا وعملت واقعة بالحادثة وهو مان عاوز يمضينى تنازل عن قايمتى لحد ما أهلى ياخدونى وأنا رفضت تماما”.

وحكمت المحكمة بالطلاق طلقة بائنة وإلزام الزوج بالقائمة وباقى النفقات.