زوجة تطلب الطلاق بسبب أهل زوجها

كتب -أسماء سرور

رفعت السيدة “حبيبة .ك”  28 سنة على زوجها طلاق للضرر بسبب إضطرارها للعمل فى وظيفتين لتستطيع ان تكفى حاجة البيت فى المصاريف.

وقفت حبيبه أمام المحكمة وقالت:” أنا متزوجة من سنتين جوزى كان معرفنا أنه شغال شغل كويس والخطوبة كانت فترة صغيرة بسبب أن بابا قال “مش عاوزين حد داخل خارج إحنا عندنا الجواز على طول ” تم الجواز بعد شهرين خطوبة والدنيا كانت كويسة فى الأول لحد ما عرفت أنه معندوش شغل وقاعد فى البيت أمه بتصرف عليه من المعاش البسيط”.

وأضافت السيدة :”طبعا اتصدمت بس قولت خلاص هشتغل لحد ما يلاقى وظيفة مناسبة وكنت بدور معاه لحد ما لاقيت أنه أمه كل يوم تعزم حد من أهلها عندى فى البيت حصل خلاف ومد إيده عليا غضبت ومشيت على بيت أهلى” .

الحمل سبب الرجوع

واكملت السيدة:” بعد ما غضبت بكام يوم عرفت إنى حامل ساعتها بابا رجعنى وقال عيشى رجعت وفضل الوضع زى ما هو وزاد أن أمه جت تعيش معانا عشان تراعينى زى ما كانوا بيقولوا اتفاجئت أنه المصاريف مش بتكفى وطلب أشتغل شغل تانى نزلت بالفعل ولاقيت أن كل الفلوس بتتصرف عزومات على أهله أعترضت عشان كنت فعلا تعبانه ضربنى تانى ودة سبب ولادة مبكرة وهو وامه حتى مطمنوش عليا بعتنا عاوزين نطلق رفضوا عشان القايمة رفعت طلاق للضرر”.

حكمت المحكمة بالطلاق طلقة بائنة وإلزامه بكافة النفقات المترتبة على الطلاق .