سيدة تخلع زوجها بسبب ” الجيران”
كتب-أسماء سرور
رفعت السيدة “سما. أ “35 سنة دعوى خلع على زوجها بسبب وإستغلال الجيران منزلهم دون أي رد فعل من زوجها.
وقفت سما أمام محكمة الأسرة وقالت :”انا متجوزة من 12 سنة جوزى شخص طيب جدا لدرجة ان الناس بتستغله ولكن الوضع دلوقتى زاد عن حده، الجيران عندنا كانوا بيضايقونا ويعملوا مشاكل معانا بيقعدوا تحت البيت ودة سبب المشاكل صوتهم العالى وكمان بليل شرب الشيشة والالفاظ الصعبة اللى بتتقال وأنا عندى أطفال”.
وأضافت:” حاليا الجيران تقريبا خدوا اوضة من بيتنا فتحوها وعملوا ورشة تحت البيت وإحنا مش عارفين ننام ولا تقعد من الصوت العالى، طلبت من جوزى يطلب منهم يقفلوها او حتى يفتحونها فى بيتهم ونرجع الأوضة اللى خدوها كان رده فى منتهى السلبية ان كده هيحصل مشاكل وإحنا مش بنقعد فى الدور الارضى كلمت اخواته قالوا ليه انهم لازم يتكلموا ولو عاوزهم معاه ولكن هو رفض، هددته إنى اسيبه بسبب السلبية اللي فيها ولكن معملش اي رد فعل، طلبت الطلاق رفض وقال أنه بيحبنى وبيحب عياله ولكن أنا عاوزة راجل شخصيته قوية مش سلبى ولجأت لطلب الخلع”.
قبلت المحكمة الدعوى ولم تصدر حكمها حتى الآن.
