سيدة ترفع طلاق للضرر كلمة السر “علقة موت “

كتب -أسماء سرور

رفعت السيدة” ندا .أ ” 30 سنة على زوجها طلاق للضرر بعد ضرب زوجها لها محدثا إصابات وكسور بالجسم .

وقفت السيدة أمام المحكمة وقالت:” من بعد الفرح بيوم ضربنى كنت لسه عروسة قولت لأهلى كلموه طبعا وشدوا عليه بس طبعا خافوا من كلام الناس إنى أغضب تانى يوم فقالوا ليا إحنا حلينا الموضوع ومش هيتكرر ساعتها عرفت أن أهلى مش هيقفوا جنبى”.

خلافات زوجية

وأكملت السيدة:”طبعا مع أى خلاف بيضربنى ويهينى وكل شوية الموضوع بيطور الأول كان بإيده بعد شوية بقى بالعصاية بعدها بالحزام ودلوقتى أى حاجة تيجى قدامه بيضرب بيها “.

الضرب المبرح

وأضافت السيدة:” كنت بخاف أعارضه وعيشت ساكته وقولت ربنا يهديه لحد ما خلفت 3 عيال ولاقيته مسك إبنى الكبير عنده 9 سنين بالحزام والولد يصوت كنت بحوش عنه مسكنى ضربنى وسحلنى فى الأرض وخبطنى بالفازة فى راسى اتخيطت 6 غرز وكسر إيدى وعملى كدمات فى جسمى كله الجيران دخلو خرجونى طلعت على القسم عملت محضر ورفعت قضية طلاق للضرر وشروع فى القتل زى ما قالى المحامى” .

وحكمت المحكمة بالطلاق طلقة بائنة بينما لم يصدر حكم حتى الآن فى القضية الأخرى .