سيدة تشتكي لبريد «مولاتي»:”حماتي قالت لي كلام قاسي”
أرسلت سيدة تدعى منى رسالة لبريد «مولاتي» تشتكي من عدم استقرار علاقتها مع اهل زوجها، وتطلب من مولاتي حل لهذه المشكلة.
علاقتها بأهل زوجها:
وقالت منى:” متجوزة بقالي أربع سنين، وعلاقتي بأهل جوزي مش دايمًا مستقرة، لكن بحاول دايمًا أحافظ على الود، وكل سنة في رمضان بنتجمع في بيت حماتي، وبيكون يوم طويل مليان تجهيزات، ودايمًا بحاول أساعد بكل اللي أقدر عليه”.
وتابعت:”السنة دي، قبل الفطار بساعتين، حصلت مشكلة بيني وبين سلفتي بسبب ترتيب السفرة، وكانت حاجة عادية، لكن حماتي تدخلت وبدأت تقارن بيني وبين باقي زوجات ولادها، وده وجعني جدًا، وقالت لي كلام قاسي، وكأنها بتلمّح إني مقصّرة، رغم إني ببذل مجهود كبير علشان أرضيهم”.
صوت الخناقة
وقالت:”لما جوزي دخل على صوت الخناقة، بدل ما يهدّي الأمور، زعق لي واتهمني إني بعمل مشاكل، وكأن الغلط دايمًا مني. حسيت إني لوحدي، وإن محدش حاسس بيا، لا جوزي ولا عيلته”.
وأكملت:”مع أذان المغرب، قعدت على السفرة، لكن الأكل كان ناشف في حلقي، مش بسبب الصيام، لكن بسبب الحزن. بعد الفطار، حاولت أتكلم مع جوزي وأشرح له إحساسي، لكنه كان متضايق ومش مستعد يسمعني..أنا دلوقتي مش عارفة أتعامل إزاي؟ هل المفروض أسكت وأتحمل علشان البيت، ولا آخد موقف وأرفض المعاملة دي؟ أنا حاسة إني تعبت، ومش عارفة أكمل على الوضع ده”.
مولاتي ترد:
رد مولاتي :” يا منى، متزعليش، عارفة إن الموقف وجعك، بس متخليش حد يهز ثقتك في نفسك. أهم حاجة إنك تفصلي بين احترامك لأهل جوزك وبين إنك تسمحي لهم يقللوا منك”.
وجوزك كمان ممكن يكون مضغوط، لكن ده مش مبرر إنه ميسمعكيش. اختاري وقت هادي بعد رمضان وتكلمي معاه بهدوء، قولي له إنك محتاجة دعمه مش نقده، ولو المواقف دي بتتكرر، خدي خطوة للخلف، وساعدي بس على قد طاقتك من غير ما تجهدي نفسك نفسيًا. أنتِ ليكي قيمة، ومحدش يقدر ينقص منها.
