سيدة تطلب الخلع بسبب”الحب القديم”
كتب-أسماء سرور
“بيسمع كلامها وياخد رأيها فى كل حاجة وأنا مليش لازمة عنده” هكذا بدأت جنات كلامها داخل محكمة الأسرة التى طالبت بالخلع من زوجها ياترى إية الحكاية.
عريس محترم
وقفت جنات أمام محكمة الأسرة وقالت”تقدم لى زوجى بطرؤقة تقليدية وكان فى نظر أهلى وكل اللى حواليا عريس محترم مينفعش يترفض، راجل شغال فى بنك وعنده شقه وشكله وسيم مكنش فى أى سبب للرفض.
اكملت جنات وقالت” اتخطبنا ومع الوقت عرفت أنه كان بيحب واحدة معاه فى الشغل ولكن حصل مشاكل وسابته واتجوزت واحد غيره وهو كان لسه بيحبها ولما قولتله خطبتنى ليه قال عشان شوفتك مناسبة”
علاقة الحب القديمة
تابعت جنات كلامها وقالت”غضبت وقررت فسخ الخطوبة ولكنه صلح الأمور بسرعة وعشان يبين أنه شارينى طلب كتب الكتاب واهلى وافقوا وبعدها تم الفرح من ساعتها وحياتى جحيم طول اليوم معاها فى الشغل، يرجع البيت يكلمها على الواتس ولما أقوله ليه يقول فى مشكلة فى الشغل”.
أضافت جنات”انا كأنثى الكلام دة مكنتش بصدقه كنت حاسه أن فى حاجة غلط وطبعا كان بياخد رأيها فى كل حاجة حتى فى اختيار هدومه وانا حسيت إنى مليش لازمة فى حياته ولما واجهته قال أنه لسه بيحبها ومش قادر ينساها حتى وانا معاه، الكلام وجع كرامتى وغضبت عند أهلى وقررت رفع خلع عليه.
قبلت المحكمة الدعوى ولم تصدر حكمها حتى الٱن.
