سيدة تطلب الخلع بسبب”غيرة زوجها من نجاحها”
كتب -أسماء سرور
رفعت السيدة “مريم.م” 23 سنة دعوى خلع على زوجها بعد سنة زواج بسبب غيرته من نجاحها فى العمل وخيرها بين ترك العمل أو الطلاق بدون حقوق.
وقفت مريم أمام محكمة الأسرة وقالت:” أنا متزوجة من سنة عن قصة حب كبيرة لأنه كان زميلى فى الجامعة وكنا بندرب مع بعض فى نفس الشركة وأول ما اتخرجنا كملنا شغل فيها ولكن هو مكنش ملتزم فى الحضور أو تحقيق التارجيت المطلوب وبالتالى أنا اترقيت فى مدة قصيرة وأصبحت المديرة فوقه وده كان بعد جوازنا بشهرين بس”.
وأضافت مريم:” ساعتها جوزى كان مضايق جدا لدرجة طلب إنى أسيب الشغل لأنه مش هيقبل أكون أعلى منه سواء فى الشغل أو المرتب وكان بيقول ساعتها هتاخدى المرتب دة منى لأنه مرتاح ماديا وأعلى منى بكتير وأنا رفضت وقتها لأن كان عليا أقساط فى الجهاز بسبب حكم أهله بأنواع معينة فى الأجهزة الكهربائية والجهاز بصفة عامة ودة كان تكلفته عالية جدا اضطريت أتحملها أنا، فهمته أن مش هينفع أسيب الشغل رفض وغضبت عند أهلى وقتها،اكتشفت وقتها إنى حامل وساعتها بابا اتصل بيه وجه صالحنى واتقفل الموضوع ظاهريا ولكن كان جواه مش راضى،وبقى يتحجج بالحمل وإنى لازم أخد أجازة طلبت من الشركة الشغل من البيت وافقوا وهو اضايق أكتر ولكن شاء القدر والحمل نزل،حملنى المسئولية كاملة وعيشت أيام صعبة”.
وأكلمت مريم:” رجعت نزلت الشغل تانى ودة خلى الأمور بينا متبقاش مستقرة لحد ما فى يوم عمل غلطة فى الشغل واضطريت أخصم ليه وساعتها اتعصب عليا فى الشغل وكانت مشكلة كبيرة اتحول بسببها للتحقيق، رجعنا البيت خيرنى بصراحة إما أسيب الشغل واختار بيتى أو أمضى تنازل عن كل حقوقى واطلق،ساعتها قررت أرفع خلع لأن الحياة أصبحت مستحيلة”.
وحكمت المحكمة بالخلع والطلاق طلقة بائنة.
