سيدة تطلب الخلع بسبب “سفر زوجها”

كتب -أسماء سرور

رفعت السيدة “هاجر .م “40 سنة دعوى خلع على زوجها بسبب سفره خارج مصر طوال فترة الزواج.

وقفت هاجر أمام محكمة الأسرة وقالت:” أنا متزوجة من عشرين سنة عيشت فيهم مع جوزى طول المدة دى أقل من سنة بعدد الأيام ،استحملت كتير وكنت عايشة لوحدى من غير أطفال هو بينزل كل 3 سنين اقل من شهر طلبت أكتر من مرة نعمل تحاليل أو حقن مجهرى ونجيب أطفال يقولى إحنا كويسين كدة ومش عاوز يخلف أو مش عارفة يمكن عنده مشاكل ومعرفش”.

وأضافت:” إحنا فى بلد فلاحين كنت كل ما أطلب الطلاق أهلى يردوا ويقولوا أخلاقه كويسة وأنا مكنتش عندى رد على السؤال دة لان حتى التواصل بيتقطع بينا طول مدة سفرة لحد ما قبل ما يرجع بشهر يفتكر أن ليه زوجة ويجى يصالح أهلى وياخدنى ويمشى أتكرر الموضوع ده أكتر من 6 مرات ، اهلى كانوا بيفرحوا بطقم الدهب واللبس اللى بيجيبه وهو جاى بيقولوا شاريكى وأنا محدش حاسس بالنار اللى جوايا ،كنت بسكت وبقول بلاش خراب بيت مع العلم أنه مش بيبعت ليا مليم واحد طول ما هو مسافر كل فلوسه لأمه وأخواته وأنا الحمد لله شغالة مش محتاجة منه حاجة ولكن فى حالتى الزواج فقد الأسس اللى بيقوم عليه ،زهقت من طلب الطلاق ومش عاوزة منه أى حاجة كل اللى أنا عوزاه إنى أسيب الإنسان دة اللى آذانى نفسيا بكل الطرق” .

وحكمت المحكمة بالخلع والطلاق طلقة بائنة.