سيدة تطلب الطلاق بعد الزواج من أخو جوزها..ياترى إية الحكاية؟

كتب -أسماء سرور

عندما نسأل أى زوجة عن أمنيتها تقول بيت سعيد وحياة هادئة وهو عكس ما حدث مع “أمنية.28سنة” التى أجبرتها عائلتها على الزواج من أخو زوجها تعالوا نعرف إية الحكاية.

حياة سعيدة

تحكى أمنية وتقول: “أنا كنت متجوزة من ابن عمى وكنت بحبه وبتمناه من الدنيا وبدعى ربنا يجمعنى بيه ومصدقتش نفسى لما جه اتقدم ليا قعدت ازغرط وفرحة الدنيا فى قلبى واتخطبنا 4 شهور بس وبعدها اتجوزنا وحياتنا كانت جميلة والكل بيحسدنا عليها خصوصا بعد نا ربنا كرمنى بالولد والبنت،لكن القدر كان مخبى لينا حاجة كبيرة جوزى وهو مسافر على شغله عمل حادثة وجاله نزيف داخلى ومات”.

الإجبار على الزواج

استكملت أمنية كلامها وقالت:”بعد ما جوزى مات وخلص العزا لاقيت أخو جوزى بيقولى لأبويا بص ياعمى أعتبر أمنية خلاص اتجوزت ومن هنا ورايح مسئولة منى أنا كنت فى دنيا تانية مش مركزة فى حاجة وأبويا سكت لأن مش وقته الكلام،عدت شهور العدة ولاقيت أخو جوزى بيقولى جهزى نفسك عشان كتب الكتاب الخميس الجاى لانى كنت قاعدة معاهم لسه فى البيت بقوله كتب كتاب مين قال انا وانتى طب ازاى أنا مش موافقة أنا عاوزة أعيش على ذكرى جوزى قال الرجالة خلاص حكمت ساعتها كانت الدنيا سودة فى وشى وحاولت الإنتحار ولحقونى فى المستتشفى”.

طلب الطلاق

وتابعت:”بعيون مليئة بالدموع أكملت أمنية أنا عمرى ما حبيت غير أبو عيالى ولكن أهلى أجبرونى على الجواز وعشان سلفتى مكنتش بتخلف قالوا أنا هجيب عيال وهعمل ليهم عزوة،ومن يوم ما اتجوزته وانا حياتى جحيم طبعه صعب وأسلوبه كله تحكم لدرجة أن ابنى جاله تبول لا إرادى من الخوف منه وأنا كنت حامل وسقطت بسبب حالتى النفسية قررت أعمل وقفة وطلبت الطلاق الدنيا قامت مقعدتش وكانت أول مرة حد يضربنى بالشكلة ساعتها اتصلت بأبويا وجه وعملنا قاعدة وقالوا أخر مرة كان فاض بيا وقولت أنا مش هقعد على ذمته دقيقة تانى ورفعت قضية طلاق للضرر”.

وقبلت المحكمة الدعوى ولم تصدر حكمها حتى الآن.