سيدة تطلب الطلاق للضرر بسبب “الإنجاب”

كتب -أسماء سرور

رفعت السيدة” ناهد. ف” 34 سنة دعوى طلاق للضرر على زوجها بسبب عدم الإنجاب ورغبتها أن تكون أم.

وقفت ناهد أمام محكمة الأسرة وقالت :”أنا حكايتى زى الأفلام أنا اتجوزت 15 سنة وكنت ست أصيلة مع جوزى ومع أهله وكنت بستحمل كل حاجة عشان البيت يستقر ،وطبعا جوزى راجل شرقى بعد ما عدى سنتين على الجواز ومفيش حمل بدأنا نعمل فحوصات وعرفنا أن السبب منه ساعتها طلب منى أن محدش يعرف لا عندى ولا عندة واضحى وأقول السبب منى وللأسف قبلت دة “.

وأضافت ناهد:” استحملت معايرة من أمه وأخواته وكنت بسكت عشان هو ميتكسرش وكنت بنام ودمعتى على خدى من كلامهم الصعب ،عدت الأيام وقولت خلاص نصيبى وهرضى بيه ولو ربنا أراد الحمل أكيد هيحصل ،حماتى مكنتش بتسكت لحد ما لعبت فى دماغ جوزى أنه لازم يشوف حاله ويتجوز عشان يخلف ويبقى ليه عزوة”.

واستكملت:”أنا مكنتش مصدقة المسلسل اللى بيحصل قدامى وكنت بقوله هو من كتر ما عيشنا فى الكدبة صدقتها قال من حقى أشوف حالى يمكن ربنا يكرمنى من غيرك ،وبدأ فعلا يدور على عروسة ساعتها رفضت العيشة دى وقولت خلاص عاوزة أطلق رفض تماما وقال مش معايا فلوس عشان أطلق دلوقتى قولتله معاك فلوس بس تخطب وتتجوز ،وقررت رفع طلاق للضرر وأخذ كل مستحقاتى” .

وحكمت المحكمة بالطلاق للضرر طلقة بائنة وإلزام الزوج بكافة النفقات المترتبة على الطلاق.