سيدة تطلب الطلاق للضرر بسبب داء السرقة

كتب -أسماء سرور

رفعت السيدة منى .م 28 سنة دعوى طلاق للضرر على زوجها بسبب سرقته لقائمة المنقولات وبعض الأموال من منزل أهلها.

وقفت منى أمام محكمة الأسرة وقالت أنا متجوزة من 4 سنين جوزى طبعه صعب وكنت بغضب كل شوية بسببه وبسبب تصرفات أهله ولكن أهلى كانوا بيقولوا ربى بناتك معاه ويبقوا فى وسط أب وأم والموضوع كان بيتحل وقتها ونرحع تانى لنفس الخلافات.

وأضافت أخر خناقة خدت دهبى وروحت لأهلى بسبب ضربه ليا وللبنات ضرب مبرح لدرجة أنه ضرب بنتى الرضيعة وهى على ايدى ساعتها قررت أمشى وأطلق وأثبت الضرب فى محضر رسمى ولكن حد من أهله لعب فى دماغه وقاله ياخد القايمة وساعتها مش هيبقى ليا حق ولا هعرف أثبت حاجة ،وجاب أهله وجه أعتذر واتأسف واتكلموا مع بابا أن مستقبله هيضيع وهو قال لبابا هكتبلك كل الضمانات ومصى على وصل أمانة وقدر يقنع بابا أنه يبات معانا فى البيت عشان نخرج يومين معاهم ونغير جو وفعلا بات معانا وتانى يوم كان مشى واخد القايمة ووصل الأمانة وفلوس بابا كان شايلها ،عملنا محضر بالسرقة ورفعت طلاق للضرر عليه لإستحالة العشرة مرة أخرى.

حكمت المحكمة بالطلاق طلقة بائنة وإلزام الزوج بكافة النفقات.