سيدة تطلب الطلاق للضرر.. كلمة السر “ضرتها”
كتب -أسماء سرور
رفعت السيدة “نادية. ك” 35 سنة دعوى طلاق للضرر بسبب إصرار زوجها على وجود ضرتها فى بيت العيلة.
وقفت نادية أمام محكمة الأسرة وقالت:” أنا متجوزة من 13 سنة وعندى 3 أطفال كنت بحب جوزى أوى بحكم أننا كنا قرايب وكنت بتمنى يتجوزنى ولما عرفت أنه بيحب واحدة زميلته فى الكلية زعلت جدا واتمنين إنى أتجوزه وفعلا هيا اتخطبت وسأبته وأنا اتجوزته وعيشنا مع بعض أجمل 9 سنين”.
وأضافت نادية :”جوزى محترم وكويس وخلوق ولكن عيبه أن قلبه مكنش معايا كان معاها هيا اللى القدر لعب لعبته وهيا اتطلقت والحظ كلمته يشوف ليها شغل معاه فى نفس الشركة وطبعا هو ما صدق ومن هنا بدأت علاقتهم ترجع وجالى يصارحنى أنه هيتجوز انا اتصدمت ولكن من حبى فيه مقدرتش أطلب الطلاق ولكن قولتله مش همنعك ولكن متتغيرش معايا ولا مع الولاد وهو وافق”.
واستكملت نادية:” بالفعل اتجوزها على طول وبقى فرحان وسعيد وأنا قلبى بيتقطع شويه وبقى يحضرها الأفراح والمناسبات فى العيلة كل دة وأنا بموت وبقت تيجى البيت تقعد مع حماتى،والزيارة أتكررت وبقت بتيجى كل خميس تسهر معاهم وأنا عيالى بقينا فوق لحد ما اتفاجئت بجوزى بيجهز شقة فى البيت وبيبلغنى أنها هتيجى تقعد هنا معانا بحيث أنه يبقى فى نفس البيت ومع العيال على طول ،ساعتها غضبت وقررت إنى لا يمكن أقعد لحظة تانية على ذمته اللى ضايقنى أنه محاولش حتى يصلحنى ولا فكر يجى ليا بيت أهلى بقالى أكتر من 6 شهور ولكن بيبعت مصاريف العيال، لحد ما رفعت طلاق للضرر”.
وحكمت المحكمة بالطلاق طلقة بائنة وإلزام الزوج بكافة المصاريف.
