سيدة تطلب طلاق للضرر بسبب”زواجه عليها”
كتب -أسماء سرور
رفعت “شروق .ك” 26 سنة دعوى طلاق للضرر بسبب زواج زوجها عليها .
وقفت شروق أمام محكمة الأسرة وقالت:” أنا اتجوزت 8 سنين وهو ولد وحيد مع أخت واحدة كنت بعمل كل حاجة كويسة معاه ومع أهله لأنى كنت صغيرة كانوا بيضحكوا عليا بالكلام إنى بنتهم وهما بيحبونى وأنا كنت بخدمهم ،حتى لما تعثر فى تجهيز الشقة وقت الخطوبة خد دهبى وباعه عشان يكمل الشقة وأنا كملت باقى الجهاز” .
وأضافت:” حمايا وحماتة توفوا بعد الجواز بأربع سنين فى حادثة زعلت عليهم وساعتها عيلة جوزى أتجمعوا وقالوا أخته تعيش معاكى قولت هيا ملهاش حد غير أخوها بعد ربنا وافقت وجت عيشت بسببها أسوء فترة فى حياتى كانت غيرانة وبتعمل مشاكل وكل ما أشتكى يقولوا ظروفها صعبة أستحملى وأنا كمان معايا توأم وحامل أستحملت لحد ما كتر المشاكل حصل إجهاض وقولت الحمد لله ،أخته لعبت فى دماغه إنى مش بخلف غير بنات ولازم يتحوز عشان يجيب ولد وفعلا عرفته على واحدة صاحبتها ومشيت فى موضوع جوازه لحد ما تم وأنا أكتشفت دة بالصدفة ،الدنيا أتقلبت وزعلت على أخرة خدمتى ليهم يعملوا كدة قالت حقة يتجوز ويجيب ولد سيبت الشقة وغضبت عند أهلى عرفت من الجيران أن عروسته جت شقتى وعايشة على فرشى ،طلبت أخد حاجتى ونطلق رفضوا لجأت للمحاكم عشان أخد حقى”.
وحكمت المحكمة بالطلاق طلقة بائنة وإلزام الزوج بكافة النفقات المترتبة على الطلاق.
