قلة تقدير سلفتي حرق قلبي.. مشكلة من بريد مولاتي
كتب- ندى الجبالي
ما أقسى قلة تقدير صنع الخير وخاصة إذا جاء من الأهل.. ففي مشكلة من بريد مولاتي تقول ا.ي “: عاوزة اخد رأيكم أنا عندي ٤ سلايف كل واحد فى حاله سلام سلام وخلاص جه حصل موقف مع سلفتى وكانت هتسيب ولادها لوحدهم فى الشقه لان محدش من أهله جمبها متجوزة فى بلد بعيده رحت كلمتها، وقلتها هتيهم عندي يقعدوا مع ولادى لحد ما ترجعى جوزها كان بيعمل عملية ولازم تروح معاه”.
وتضيف: ” هى وافقت وجم ولادها وأقسم بالله كنت شيلاهم على دماغى من أكل لشرب لتوصيل مدارس لمعاملة كويسه مكنتش بزعل حد منهم بالعكس لو العيال شدوا مع ولادى كنت باجى على ولادي عشانهم وكان شغل البيت مضاعف كان طالع عينى بمنعى الكلمة”.
وتستكمل: “لما رجعت معبرتنيش بشكر خالص ولا جت عندى شكرتنى ولا أما روحت عزمتنى عندها ان شاءالله من باب جبر الخواطر، فى العيد ده اتقابلنا راحت مسلمه عليا ببرود جامد وخددت بعضها ومشيت فى دقيقة وعرفت بعد كده انها اتصلت بسلفاتى وعيدت عليهم واتجمعوا كلهم وعيدوا مع بعض”.
وتختتم: ” أنا دمى محروق من ساعة ماعرفت احنا حتى لو مفيش بينا ود كان المفروض بعد اللي عملته معاها ومع عيالها تقدرني وتغير معاملتها معايا حتى والعيال عندي عمرها ما كلمتني على تلفوني تتطمن مني على العيال كانت تتصل بعيالها على تلفوناتهم وتسألهم كلتم شربتوا وتكلمهم ساعة فيديو ميهونش عليها تقلهم أدوني مرات عمكم بجد محروق دمي منها اوي، قولولي اتعامل معها ازاي وخاصته ان عندي مناسبة كمان اسبوعين اتصل اعبرها واقلها ولا لاء”.
رد مولاتي
أولًا . . لماذا تنتظرين التقدير ممن لا يحسنوا تقديمه.. انتي كنتي تعلمين طباع سلفتك من البداية وقررتي تقديم الإحسان، وعندما لم تجدينه ما زلتي تنتظرين..
جزاكي الله كل الخير على صنيعك، ولكن لماذا تبخسين نفسك حقها بهذا القدر.. تجاهلي من لم ينظر لكي نظرة ترضيكي وأرفعي أنفك عاليًا فلا يوجد على الأرض من يستحق ان تشغلي عقلك بقلة تقديره.
