من دفتر أحوال المحاكم..سيدة تطلب الخلع بسبب المستوى المادي

كتب -أسماء سرور

يقوم الزواج على مبدأ التكافؤ بين الزوجين فى كل شئ، وماذا لو كانت الزوجة أعلى فى المستوى المادى هل يستقر الزواج؟.

تروى”منة.28 سنة” حكايتها وقالت:” أنا كنت عايشة حياة مرفهة فى بيت أهلى لحد ما اتجوزت حياتى كلها اتغيرت”.

الرفاهية

وبدأت منة كلامها فى دعوى الخلع وقالت”مش قادرة أعيش فى مستوى أقل لأنى طول عمرى مدلعة فى بيت أهلى وكانت ماما مش بتعمل حاجة فى البيت ولا انا كنت بعرف أعمل حاجة كان عندنا ناس بيخدمونا، واتعرفت على جوزى فى الكلية وحبيته كنت فاكرة ان الحب كل حاجة لحد ما اتصدمت على الواقع المرير”.

مستوى أقل

وأضافت منة بتأثر قائلة:”اتجوزنا وكان لسه فى بداية حياته محاسب فى شركة وبابا قالى هتتعبى مش دى العيشة اللى كنتى عيشاها رفضت وقولتله هنبدأ من الصفر معرفش ان الموضوع بدأ من تحت الصفر كمان،لاقيت كل الحاجات المتعودة عليها مستحيلة حتى زى السفر والخروج والشوبينج بقيت مسئولة أدبر واوفر عشان نعيش بالمرتب لدرجة إنى قررت نأجل الخلفة ، كل ما أروح لأهلى أحس إنى اتحرمت من الحياة دى وهما مكنوش بيقصروا كانوا بيجيبوا ليا كل حاجة ودى حاجة ضايقتنى أكتر، لحد ما اختى الصغيرة اتخطبت لواحد نفس المستوى وجاب ليها شبكة كبيرة وهدايا وطبعا مكان ومستوى ممتاز هتعيش فيهم،فوقت ساعتها على اللى بيحصل فيا وقررت أطلب الطلاق وهو رفض لأنه بيحبنى جدا ولكن مش دى العيشة اللى كانت فى خيالى،قررت رفع خلع والرجوع لحياتى والمستوى بتاعى تانى”.

وقبلت المحكمة الدعوى ولم تصدر حكمها حتى الآن.