“مصمم يربى كلب وأنا بخاف منهم”.. سيدة تشكتي وتطلب الخلع

كتب -أسماء سرور

رفعت السيدة “رنا.ط” 28 سنة دعوى خلع على زوجها بسبب تصميمه على تربية كلب مع علمه أنها لديها خوف من الكلاب.

قصة حب كبيرة

وقفت رنا أمام محكمة الأسرة وقالت:” أنا متجوزة من 3 سنين عن قصة حب كبيرة والحمد لله بينا تفاهم كبير وعندى ولد واحد وحياتنا كانت مستقرة لحد من 6 شهور صاحبه جاب ليه كلب عشان كان مسافر أسبوع وسابه أمانة معاه عشان يخلى باله منه لما عرفت كدة خدت بعضى وروحت عند ماما بسبب خوفى من الكلاب أو ممكن نقول فوبيا، رجعت البيت بعد ما الكلب مشى وقعدت أنضف وأعقم وكنت مضايقة جدا”.

تربية الكلاب

وتابعت:”بعدها بشهر لاقيت جوزى بيفتح معايا موضوع أنه نفسه يربى كلب وأنه حب الكلب أوى اللى كان معاه أنت رفضت رفض قاطع لدرجة إنى اتخانقت معاه وخيرته ما بين إستمرار حياتنا أو أنه يجيب كلب فى البيت والمشكلة كبرت أكتر وساعتها الأهل اتدخلوا وقالو يشمع كلامى وهو كان زعلان وبيمارس معايا الصمت العقابى ومش بياكل معانا قولت شوية وهيهدى والدنيا هتتحل،لحد ما فى يوم دخل بكلبين واحد صغير وواحد كبير وقالى لو عاوزة تمشى امشى عاوزة تقعدى أقعدى أنا جالى حالة ذعر ورفضت نهائى الأسلوب دة وعدم إحترامه لرغبتى وغضبت عند أهلى وقررت رفع خلع لإستحالة العشرة بينا”.

وقبلت المحكمة الدعوى ولم تصدر حكمها حتى الآن.