من داخل محكمة الأسرة..سيدة: ” تحملته طيلة سنوات الغربة..فكافئنى بالزواج من أخرى”
كتب -أسماء سرور
بعيون دامعة وقلب منفطر قالت شيماء.34 سنة: ” اتحملته سنين الغربة وفى الأخر لما حب يكافئنى على صبرى اتجوز عليا”..ياترى إيه الحكاية؟
سنوات الغربة
بدأت شيماء المكلومة كلامها بأنها تريد حقها وحق سنوات عمرها الضائعة مع جوزها الذى لم يصن لها أى جميل وقالت: ” أنا متزوجة من 16 سنة كانت حالته صعبة وعيشتنا فقيرة لحد ما واحد صاحبه قاله فى فرصة سفر ولكن محتاج مبلغ عشان تسافر،جه طلب منى الدهب وأنا لم أعترض عليه قولت حالنا هيتعدل أكيد،سافر فعلا وبقى يقعد 3 سنين فى الغربة ويرجع 45 يوم كلهم نكد وخناق على أتفه الأسباب”.
واضافت شيماء:”كنت بستنى يرجع بفارغ الصبر ومستنيه منه يطبطب عليا على المسئولية اللى شيلتها مع الثلاث أطفال فى مراحل التعليم المختلفة ولكن طبعه كان قاسى وجاف وكنت بتحمل عشان العيال”.
مكافأة الغربة
تنهدت شيماء المسكينة وقالت:”رجع أخر أجازة وكان جاى وشه متغير ولما بقوله وحشتنى قال أنا نازل وأنا واخد قرار لازم تسمعيه،انا قررت اتجوز وكنت خاطب وأنا برة ونازل على الجواز على طول،لم أشعر بنفسى إلا وأنا منهارة وبصوت لدرجة أن الجيران اتجمعوا على الصوت،كل اللى كان على لسانى دى مكافأة الغربة تتجوز عليا”
وأكملت بصدمة :”قالى لو عاوزة تطلقى خدى قايمتك،انهى قايمة اللى هاخدها وهى ملهاش لازمة دلوقتى..انا عاوزة حق سنين عمرى اللى راحت هدر معاه نفسى أخد حقى وهكذا ختمت شيماء كلامها”
وحكمت المحكمة بالطلاق طلقة بائنة وإلزام الزوج بكافة النفقات.
