من داخل محكمة الأسرة..سيدة تطلب طلاق للضرر بسبب الأمومة

كتب -أسماء سرور

بدأت السيدة”مروة.36″ كلامها بهذة الكلمات”نفسى أكون أم وهو مانعنى من الخلفة” تعالوا نشوف تفاصيل الحكاية.

تأخر الزواج

قالت مروة بعيون حزينة:” أنا اتأخرت فى الجواز فى نظر أهلى لما عديت التلاتين لدرجة أن أمى قالت خلاص كدة فرصتك راحت أقبلى بقى بواحد مطلق ولا أرمل عشان هو دة اللى يناسبك،فعلا اتقدم جوزى حاليا سنه مناسب وكان أرمل كان وقتها عنده 40 سنة،اتقدم واشترط علينا مفيش أطفال لأنه عنده 4 من زوجته المرحومة ومعندوش استعداد لأى أطفال تانى أهلى ساعتها وافقوا وقالوا ارضى بنصيبك عياله هما عيالك وكمان جايين على الجاهز مش هتتعبى لا فى حمل ولا ولادة،اقتنعت وقتها بكلامهم ووافقت على الجواز”.

رفض الإنجاب

ظلت مروة تبكى وتقول: “اتجوزت وكنت بخدمه وبخدم العيال وبعاملهم إنى أمهم بالظبط وبحبهم جدا وهما بيحبونى، ولكن غريزة الأمومة اتحركت جوايا وطلبت حقى اللى كنت اتنازلت عنه بغبائى وقتها،رفض رفض قاطع وقاطعنى تماما حاولت إنى اتكلم معاه بالتفاهم قال دة قرار نهائى أنه مش هيكون ليه أى طفل تانى،لجأت لأهلى قالوا عيشى على الوضع دة لأننا وافقنا من البداية،طلبت الطلاق رفض ،لجأت للمحكمة ورفعت دعوى طلاق للضرر الواقع على”.

وقبلت المحكمة الدعوى ولم تصدر حكمها حتى الآن.