من دفتر أحوال المحاكم..سيدة تطلب الطلاق بسبب “خالة زوجها”
كتب -أسماء سرور
رفعت السيدة “رجاء.س” 32 سنة دعوى طلاق للضرر على زوجها بسبب خالته وإصرارها على الزواج من ابنتها.
وقفت رجاء أمام محكمة الأسرة وقالت:” أنا متجوزة من 12 سنة وجوزى راجل محترم والناس كلها تشهد بأخلاقه وعندى منه بنتين ولكن كنت عارفة أنه كان بيحب بنت خالته أوى واللى مكنش نصيب ليهم مع بعض بسبب عدم سماع الكلام ودة السبب اللى قاله ليا واختارنى أنا بالعقل بحكم إنى جارتهم وكان شايف إنى كويسة وأخلاقى محترمة وأنفع ست بيت”.
وأضافت رجاء :”اتجوزنا وعيشنا مع بعض وكانت حياتنا حلوة لحد ما بنت خالته اطلقت وجت عندنا البيت من سنتين قالتله أنها بتحبه وانا كنت هموت وهى بتتكلم،من الصدمة مقدرتش أعمل أى رد فعل وهو كمان منطقش،مرت الأيام ولاقيت خالته بتفاتح أمه أنهم لازم يرجعوا الماية لمجاريها وحماتى وافقت وانا بقولها إزاى دة أنا كنت بخدمك قالت “أنا أولى بلحمى وعرضى دى بنت اختى فى الأول والأخر” قررت أتكلم مع جوزى قال أنه بيحبها وهى حب عمره ولو بحبه هوافق يتجوزها رفضت وغضبت عند أهلى لحد ما لاقيت صور خطوبتهم على الفيس،كلمته أطلب الطلاق رفض قال أنه عاوز يربى العيال بينا،رفعت طلاق للضرر”.
وحكمت المحكمة بالطلاق طلقة بائنة وإلزام الزوج بكافة النفقات.
