من دفتر أحوال المرأة ..سيدة تطلب الخلع بسبب “مكان الولادة”
كتب -أسماء سرور
رفعت السيدة “فاطمة .س” 22سنة خلع على زوجها بسبب تحكم أمه فى مكان ولادتها وعدم وجود شخصية لزوجها .
وقفت فاطمة أمام المحكمة، وقالت:” أنا متجوزة من 5 شهور شوفت فيهم العذاب من حماتى وتسلطها وتحكمها فى كل اللى فى البيت ،حماتى بتحكم عليا انا وسلايفى ننزل من الفجر ومصممة أننا نخلص شغل البيت بدرى وعاوزة تعيش على النظام القديم ولما رفضت وقولتلها إنى بحب السهر عملت مشكلة كبيرة وحكمت عليا انزل بعد اسبوع جواز أخدم مع سلايفى” .
وأضافت:” ربنا كرمنى وحملت بعد شهرين من الجواز وبقول أنا هروح أكشف واتابع مع دكتورة قالت مفيش الكلام دة عندنا البيت كله حمل وولد ومحدش فيهم لا راح لدكتور ولا مستشفى قولتلها إنى مش واخدة على الكلام دة قالت إحنا هنا فى البيت كدة وسلايفك ماشين على النظام دة ،رجع جوزى وبفتح معاه الموضوع أن لازم أتابع مع دكتور قال اللى أمى تقول عليه هيمشى محدش فينا بيقدر يمشر كلمتها استغربت كلامه بالرغم من أنه متعلم ولكن مكنتش أعرف أنه تابع لأمه اوى كده ورفضت طبعا الحياة بالطريقة دى قال مقدرش أعمل غير اللى أمى تقول عليه ،غضبت عند أهلى وطلبت الطلاق حماتى كلمتنى وقالت خليكى عند أهلك إحنا خلاص مش عايزينك وهجوز أبنى واحدة احسن منك وقالت مفيش طلاق ولا قايمة ولا ليكى حاجة عندنا ،لجأت للخلع للحصول على قائمة منقولاتى” .
وقبلت المحكمة الدعوى ولم تصدر حكمها حتى الآن.
