من دفتر أحوال المرأة..امرأة خلع زوجها بسبب الكهرباء

كتب -أسماء سرور

رفعت السيدة” منال .ح ” 30 سنة دعوى خلع على زوجها بسبب البخل الشديد والخوف من استهلاك الكهرباء.

وقفت السيدة منال أمام المحكمة، وقالت:” خطوبتى كانت فترة قليلة جدا وكان بصراحة أهله مش بيقصروا فى المواسم وقولنا دة مرتاح وأهله مرتاحين يبقى الدنيا هتبقى كويسة وتم الزواج بعد 3 شهور بس جهزوا فيها أعلى جهاز ونفذوا كل طلباتنا”.

وأضافت:” بعد الجواز سافرت أسبوع فى فندق محترم وأهلى كانوا فرحانين عشان إحنا على اد حالنا ،ظهر بعد الجواز بكام شهر لما خزين البيت خلص طلبت منه أكل يقول مشى بأى حاجة عندك ومبقاش يجيب لحوم ولا فراخ إلى كل فين وفين وطبعا بيقلل إستهلاك الكهرباء ،لاقيته بيقول الصح نفصل التلاجة بليل ونشغلها الصبح كنت فاكرة أنه كده خايف على التلاجة تبوظ” .

وأكملت” بعدها بدأ يقول نقعد فى أوضة واحدة أحسن عشان الشقة متتبهدلش قولت ماشى وهو مش عاوز يشغل أى نور فى الشقة إلا لمبة واحده بس ،وطبعا كان بيبقى يوم أسود لما أطلب نشغل المروحة يقول عضمى بيوجعنى وهو أصلا بيوفر “.

حساسية الجلد

واستكملت زادت المعاناة لما خلفت وقال مشى نفسك بأى لبس ومرضيش يجيب هدوم للبيبى وأهلى وأهله بصراحة جابو كل حاجة اللى زود الدنيا لما بقوله نشغل التكييف البنت جالها حساسية فى جسمها والدكتور طلب كدة قال مستحيل افتحى الشبابيك وخلى الأوضه تتهوى ،بقيت كل ما انسى لمبة شغالة يزعق وقالها بصراحة طول ما أحنا فى الشقة هيا لمبة واحدة بس اللى هتشتغل أنا مش هدفع كهربا كتير ،اتخنقت من الوضع دة والبخل غضبت وروحت بيت أهلى ،لما كلموا أهله حاولوا يقنعوه أن لازم يصرف ويعدل من تصرفاته رفض ،ساعتها صممت على الطلاق وهو رفض وعاند أكتر عشان المؤخر والقايمة” .

قبلت المحكمة الدعوى لم تصدر حكم حتى الآن .