طريقة عمل صينية بطاطس بالفراخ وارز بشعرية..طعم زمان وريحة زمان

كتب -أسماء محمود

تعتبر صينية البطاطس بالفراخ من الأكلات المحببة لدى الجميع ولها تقدير خاص فى كل منزل ،عندما تحتارين فى الأكل تكون صينية البطاطس هى الحل ويمكن أن تكون صنف رئيسى فى العزائم .

يقدم لك «مطبخ مولاتى» طريقة صينية البطاطس بطعم وريحة زمان:

المكونات

فرخة وزن 2كيلو

كيلو بطاطس

2بصل مقطع جوليان

ملعقة ثوم مفروم

عصير طماطم

طماطم شرائح

فلفل حامى ورومى

توابل (ملح -فلفل أسود-كمون-كزبرة -زعتر-مستكة)

طريقة التحضير

• قطعى الفرخة 8 قطع وتبليها بالملح والفلفل الأسود والكمون والزعتر لمدة نصف ساعة .

•فى طاسة غير لاصقة ضعى ملعقاين سمن بلدى كبيرة ثم انزلى بالفراخ وحمريها من الناحيتين .

• انزلى بالبصل المقطع وقلبيه مع الفراخ لمدة دقيقتين ثم انزلى بالثوم حتى تشمى رائحته ضيفى الطماطم والفلفل وبعدها عصير الطماطم والتوابل الباقية واتركيها تغلى 5 دقائق.

•ضيفى شرائح البطاطس وقلبيها جيدا مع الفراخ .

•احضرى طاجن وضعى فيه الفراخ والبطاطس وملعقة سمن بلدى على الوش وضعيه فى فرن مسخن مسبقا لإتمام النضج بعدها شغلى الشواية حتى يصبح لونها ذهبى.

طريقة الأرز بالشعرية

•فى حلة على نار متوسطة ضعى ملعقة سمن بلدى كبيرة ثم انزلى بالشعرية حتى يصبح لونها ذهبى ضيفى الرز المغسول والمصفى جيدا وقلبيه لمدة دقيقة ثم ضيفى الماء الساخن واتركيه على نار عالية حتى يشرب مائه ثم هدى النار لمدة ربع ساعة.

طريقة التقديم

يقدم الطاجن ساخن مع الأرز ومخلل