زوجة تطلب طلاق للضرر بسبب “سلفتها”

كتب -أسماء سرور

رفعت السيدة “سماح .م” 35سنة على زوجها دعوى طلاق للضرر بسبب تحكمات سلفتها فى حياتها وكل القرارت الخاصة بها .

وقفت سماح أمام محكمة الأسرة، وقالت:” انا متجوزة من 13 سنة ومرات الكبير والحمد لله كنت مطيعة لحماتى وكانت راضية عنى وبنعمل كل حاجة مع بعض لحد ما سلفى الصغير اتجوز ودخلت مراته البيت ساعتها حالما اتشقلب وهيا بقت كلمتها المسموعة حتى على حماتى وبنتها” .

وأضافت سماح:” كل الناس حوالينا مشكلتهم فى حماتهم أنا مشكلتى فى سلفتى أن كلمتها بتمشى على الكل لدرجة أن لبس العيد لعيالى نزلت هيا وجوزى وجوزها يشتروه وانا مليش رأى ولا كلمة فى البيت ،الأكل هيا تختار وأنا اللى أطبخ، السوق تنزل هيا وحماتى تشترى الفاكهة والخضار على مزاجها ولما اعترضت جوزى قال إنى غيرانة،غضبت عند أهلى وأشتكيت ليهم جه صالحنى هو وأخوه زجت هيا كمان معاهم وقالت إنى أختها وعاوزة تريحنى ساعتها أهلى قالوا أرجعى بيتك” .

وأكملت سماح:” طبعا كل الكلام اللى قالته مدخلش دماغى ورجعت بيتى وبدأت أركز مع كل التصرفات ،اكتشفت أنها بتاخد فلوس من جوزى وأنه معجب بيها وبدأ يلمح ليها بالحب والإعجاب وهيا ردها أنك زى أخويا وبتتمادى فى تصرفاتها ودلعها قدامه ،طبعا نار الغيرة ولعت فيا واجهته بكل دة ضربنى وشتمنى بأقذر الألفاظ وكان بيدافع عنها وفى النهاية بقيت أنا اللى وحشة وهيا ست الكل ،غضبت عند أهلى المرة دى وطلبت الطلاق رفض هيا كلمتنى وقالت هجوزه واحدة أحسن منك من بكرة ،رفعت طلاق بسبب إستحالة العشرة وعدم تحملى هذة الحياة” .