من دفتر أحوال المرأة..سيدة تخلع زوجها بسبب “الفيزا”

كتب -أسماء سرور

رفعت السيدة مرام .م 32 سنة دعوى خلع على زوجها بسبب أخذه فيزا المرتب الخاص بها وعدم إعطائها أى مصاريف .

وقفت مرام أمام المحكمة وقالت:” أنا متجوزة من 8 سنوات من زميلى فى الشغل حبينا بعض واتخطبنا وكان من ساعة الخطوبة معاه الفيزا بتاعتى كنت بحبه وكان بيقول هنحوش مع بعض عشان نتجوز وأنا أهلى كانوا ميسورين مكنش فارق معايا المرتب اوى “.

وأضافت:” مرام مر الوقت واتجوزنا ولسه الفيزا معاه وخلفت أبنى الأول أهلى كانوا بيجيبوا كل حاجة مكنتش حاسه أن فى حاجة ناقصة لحد ما خلفت ابنى التانى كان تعبان ،اضطريت أخد أجازة من الشغل عشان أراعيه لاقيته بيقول انزلى الشغل البيت محتاج وأنا كل همى أبنى مش فارق الشغل “.

واستكملت:” ابنى الحمد لله اتحسن ورجعت الشغل بس المرة دى رفضت اديله المرتب بسبب تصرفاته معايا وبخله اللى بدأت بعد عشر سنين الاحظه أن أهم حاجة عنده الفلوس ومعرفش عنها أى حاجة هو معاه كام أو بيصرف إيه ،المهم طلب الفيزا وأنا رفضت تماما اتغير وبدأ يتنرفز ويعمل مشاكل وكل همه ياخد مرتبى مرة تانية ،لما أتأكد أن مش هياخد فلوس منى قال هيسيب البيت يمشى طلبت الطلاق منه طالما انا اللى هصرف على أولادى رفض تماما خايف يدفع فلوس”.

وقبلت المحكمة الدعوى ولم تصدر حكمها حتى الآن .