سيدة تطلب الخلع بسبب “أضحية العيد”
كتب -أسماء سرور
رفعت السيدة “تقى .م “25 سنة دعوى خلع على زوجها بسبب التقسيم فى أضحية العيد .
وقفت تقى أمام محكمة الأسرة وقالت:” أنا متجوزة من 6 شهور وبابا وحمايا أصحاب من سنين وكانوا شغالين مع بعض وشقتى جنب بيت أهلى على طول وإحنا جيران وبنحب بعض جدا انا وجوزى ولكن للأسف حصل مشاكل كتير بين الأهل وكل دة بسبب أضحية العيد” .
وأضافت:” اللى حصل أن بابا وحمايا اتخانقوا مع بعض وكل واحد اتهم التانى أن الجزار ضحك عليه وداله أكتر احنا مكناش موجودين انا وجوزى قولنا نقضى أجازة العيد نتفسح ولكن لاقينا التليفونات أن الأهل اتخانقوا مع بعض ،رجعت البيت حماتى طردتنى ولما قولتلها مليش دعوة باللى حصل حماتى سخنت جوزى ضربنى وشتمنى ،غضبت عند بابا ومحدش جه يصلح بعتنا ليهم قالوا خليكى زى ما انتى احنا خلاص هنشوف ليه عروسة احسن منك حاولت اتواصل معاه اننا بلاش نخرب بيتنا واحنا بنحب بعض قال انا هقف مع أهلى وعمرى ما هزعلهم عشان أى حد لاقيته بايعنى خالص ،اضطريت ارفع خلع عليه” .
قبلت المحكمة الدعوى ولم تصدر حكمها حتى الآن.
