اتصدمت في خطيبة أبني وقلبي مفطور.. مشكلة من بريد مولاتي
كتب- ندى الجبالي
في صدمة اكتشفتها صاحبة الرسالة الورادة في بريد مولاتي، تقول ي.س “أنا مخنوقه اوووى وحاسه قلبى هيقف وهيجرالى حاجه وعايزة اشوركم ف موضوع دلوقتى ابنى مسافر السعوديه يشتغل وهناك اتعرف على بنت مصرية زيه المهم طلعت البنت دى من نفس منطقتنا”.
وتضيف ” ابني شاورني انه عايز يتقدملها ففرحت وجوزى فرح ومعندناش اى مانع المهم اتقدملها وهو هناك فالسعودية والبنت وافقت وفرحت ف المفروض بقى اننا نروح بيتهم انا وابوه عشان نتفق على كل حاجه المهم روحت انا وجوزى عند الناس دى وبما اننا فى منطقه واحده اول ما شوفت امها عرفتها على طول”.
وتتابع” أمها دى يا جماعه شلق اووى وبتاعت مشاكل وكنت على طول بشوفها فى فرن العيش وكانت بتفضل تتخانق مع اللى بيبيع العيش وتتخانق مع الناس اللي ف الفرن وبتبقى عاملة زى المجنونه ومحدش بيعرف يسكتها واحنا عكسها خالص احنا ملناش ف المشاكل وابنى ده هادي ومحترم جدا وملوش ف المشاكل خالص”.
وتختتم” أول ما شوفتها اتصدمت وحسيت قلبى وجعنى وهى اول ماشافتنى قالتلى مش انتى اللى كنتى ف الفرن وانا بتخانق وكنتى بتحوشينى قولتلها اه المهم دلوقتى قولولى اعمل ايه انا حكيت لابنى وقولتله متزعلش نفسك واللى فيه الخير يقدمه ربنا وابنى قالى انا اسف انى حطتكم ف الموقف ده وانا دلوقتى مش عاوزه اوجع قلب ابنى لانه بيحبها بس بجد مش هنعرف نتعامل مع الست دى.. اعمل ايه”.
رد مولاتي
أولًا سلامة قلبك عزيزتي، ثانيًا أن فترات الخطوبة هي لأمور وشكوك مثل هذه، فعلى ابنك ان يقيم الأمور في ضوء الاحتكاك مع عائلة خطيبته ويختار إذا كان سيتعامل مع الأمر.
ثالثًا ان حكمك على جارتكم ليس موضوعي من وجهة نظري، فساحة الأفران هي مكان معروف عن العراك والبقاء للأعلى صوتًا وهو تعبير ساخر عن واقع مرير، لذا أرى ان تعطى لنفسك فرصة أنتي الأخرى لتقييم عائلتك خطيبة ابنك بموضوعية فكم من عالي الصوت كان قلبه أنقى من كل ما مررا بهم في حياتنا.
