سيدة ترفع دعوى خلع بعد الرجوع لزوجها..إية القصة؟
كتب -أسماء سرور
تعيش الزوجة مع زوجها على مر السنين مع تقلبات الزمن والظروف المادية حتى تبدأ الحياة تبتسم لهم، ولكن ماذا تكون مكافئة الزوجة وقتها؟، تحكى لنا صاحبة الرواية الحزينة “فاطمة.42 سنة” التى طلبت الخلع بعد الطلاق من زوجها لمرة واحدة.
بداية الزواج
قالت الزوجة:”تجوزت زوجها لمدة 17 سنة، كانت المصاريف في البداية اللى جاية على أد اللى رايح ومع ذلك كنت بشتغل وأساعده وأقول إيد على إيد تساعد خاصة اننا معانا ولدين وبنتين والحمل تقيل،كان ليه نزوات كنت بعديها عشان البيت يمشى لحد ما عمى مرة فتح موضوع السفر وهو ماصدق وبقى يحلم بالموضوع دة قولتله هتسافر ازاى قال هبيع دهبك وتاخدى قرض بضمان البيت وأسافر فعلا دة اللى حصل وحقق حلمه وسافر”.
تغير الزوج
تحكى فاطمة بحسرة وتقول:” قعد شهر كويس وبعدها قال الدنيا واقفة ومفيش مصاريف ومبقاش يكلمنى ولا يكلم العيال وبيتهرب مننا ساعتها بدأت اطلب من أهلى يساعدونى وعملت مشروع صغير من البيت يصرف علينا لحد ما عدى سنتين على الوضع دة ورجع لينا أجازة شكله متغير ومش طايق حد فى البيت وبدأ يفتعل المشاكل بعدها قطع أجازته وسافر تانى”.
معرفة الزواج
وأكملت فاطمة وقالت:” أحنا استغربنا من تصرفاته اتصلت بمرات واحد زميله أسألها على الشغل لو فيه مشاكل قالت بصراحة جوزك متجوز هنا بعد شهر وبقاله سنتين الخبر نزل عليا كالصدمة، واتصلت بيه بسرعة أفهم فيه ايه قال ايوه حبيتها واتجوزتها فى لحظة غضب قولتله يبقى تطلقنى،وقالت فاطمة بمرارة فعلا طلقنى وقالى إنتى طالق الكلمة لسه فى ودنى لحد دلوقتى انه ازاى جاب الجبروت ينطقها،مكنش فيه وقت للإنهيار إحنا علينا ديون بدأت اشتغل وعملت مشروع وكبر وبقى عندى بدل الفرع اتنين”.
طلب الرجوع
بحزن شديد أكملت فاطمة وقالت:” الأيام لفت وأنا نجحت وهو خسر كل حاجة ومراته سابته وعشان ليها جنسية تانية رجعت بلدها ومعرفش يعمل معاها حاجه،جالى مكسور وطلب الرجوع ونربى عيالنا مع بعض ولادى الكبار رفضوا والبنات قالوا فكرى ياماما ساعتها قولت نتلم تانى ورجعت ليه،الوقت دة كان قاعد فى البيت وبيعمل معايا مشاكل بقاله 6 شهور لحد ما لاقيته بيطلب منى يشتغل قولتله انزل امسك إدارة المحلات قال لا مش هشتغل عندك انا هدخل شريك معاكى قولتله ازاى تدخل شريك وانت مدفعتش حاجة قال انا عمرى ما ابقى شغال عندك واتخانقنا ومد ايده عليا،قررت اللجوء للمحكمة وطلب الخلع”.
وحكمت المحكمة بالخلع والطلاق طلقة بائنة.
