سيدة فى دعوى الخلع:”وعدنى أكتر من مرة اسافر وكل مرة يتحجج”

كتب -أسماء سرور

رفعت” نادية34 سنة” دعوى خلع على زوجها مبررة سفره لأكثر من 13 سنة لم تراه فيهم اكثر من 6 شهور وهذا أفقدها الشغف فى الحياة”..ياترى إية القصة؟.

حب العمر

وقفت نادية أمام محكمة الاسرة تتحدث بحزن عن حالها وحبيب عمرها وقالت: ” انا اتجوزت فى أخر سنة فى الجامعة وكان جوزى حبيب عمرى فرق بينا 3 سنين خطبنى وسافر يكون نفسه وفعلا قدر يعمل فلوس كويسة واتجوزنا فى أخر سنة ليا وفرحتى فى الوقت دة مكنتش تتوصف بالرغم من معارضة كل أهلى إلا إنى وافقت أسيب المدينة وأسافر فى قرية فلاحين”.

وأضافت نادية وقالت:”فرق العادات والتقاليد أثر عليا وعمل مشاكل كتير بينى وبين أهله اللى كانوا شايفين أنى مش مناسبة ليه وأنه كان لازم يتجوز واحدة من نفس بلده وخلى العلاقات بينا صعبة ودايما فى مشاكل لدرجة إنى بعد ما سافر روحت أخدت أخر سنة عند أهلى عشان أرتاح”.

تدخل الأهل

تابعت نادية بعيون دامعة وقالت: “وعدنى أسافر ليه اول ما أخلص كلية ولكنه غير كلامه وقال الظروف صعبة هاخد امى تعمل عمرة وانتى السنة الجاية،فعلا استنيت وكان ميعاد أجازته نزل وقعد معايا شهر وقالى كام شهر وهبعت أخدك ولكن طلعت حامل اتحجج بالحمل وقال استنى تولدى هنا جنب أهلك وبعدها تسافرى عدى سنتين على وعده ليا ونزل مصر تانى وكنت مصممة أروح معاه وعملت قاعدة وقال شهرين اظبط امورى وأبعت أخدك،للمرة التانية أكون حامل ويتحجج بالحمل.

أكملت نادية كلامها :”مر دلوقتى 13 سنة على وعده ليا نتجمع فى مكان واحد مع استمرار المشاكل بينى وبين أهله خيرته إما ياخدنى أو أطلق قالى خلاص هاخدك أمه عرفت صممت ياخدها معايا،اتفاجئت بيقولى هياخد أمه معايا وأخلص ليها الورق عشان يحجز التذاكر او انا يأجل زيارتى بعد أمه تخلص زيارتها حسيت أنه بيلعب بيا وبمشاعرى وإنى عمرى ما هخلص من الدوامة دى وعمرى بيتسرق منى طلبت منه الطلاق رفض تماما لجأت للخلع عشان أنا تعبت”.

وقبلت المحكمة الدعوى ولم تصدر حكمها حتى الآن.