من دفاتر محكمة الأسرة..سيدة فى دعوى الطلاق” وافقت على ضره وهو اللى مش بيعدل بينا”
كتب -أسماء سرور
هل يمكن لأنثى أن تقبل بزواج زوجها أبو أطفالها من أنثى أخرى وتكون راضية عن ذلك.. تعالوا نعرف حكاية بثينة.42 سنة.
تغير الحال
وقفت بثينة تبكى فى محكمة الاسرة على زوجها وحبيب عمرها وقالت: ” تزوجته وأنا عندى 20 سنة وبدأت حياتى معه لم يكن يمتلك حتى شقة ووقفت معه وبعت ذهبى عشان يقدر يفتح مشروع،وكنت بقف معاه وأساعده وأوفر ليه عشان يكبر وفعلا ربنا فتحها عليه وبقى عنده بدل المشروع اتنين.
وأضافت: “بثينة بحسرة وقالت”عشنا مع بعض لمدة 18 سنة وكنت نعم الزوجة ليه،مطلبتش اى طلبات شخصية كنت راضية بحياتى معاه وبحبه وكنت بقول لما هيكبر كله ليا ولأولادى،كنت بشوف خيانته وبزعل وبخاف اتكلم عشان ميحصلش مشاكل أكبر لإنى كنت بحبه جدا”.
الزواج الثانى
تابعت بثينة وقالت:” اتفاجئت بيه بعد كل السنين دى بيقولى أنه بيحب واحدة تانية واتفق معاها على الجواز وانه بيعرفنى بدل ما أعرف من بره،الكلام نزل عليا كالصاعقة وقعدت أعيط سابنى وخرج مكنش بيهون عليه يطبطب عليا،رضيت بالأمر الواقع لدرجة أنه طلب منى أحضر فرحه وبالفعل حضرت والناس كلها كانت بتتفرج عليا”.
وأكملت بثينة وقالت:” زى ما بيقولوا رضيت بالهم ولكن الهم مش راضى بيا” جوزى أتجوز وعاش حياته ورفض يجى يشوفنى حتى ولما اعترضت قطع عنى المصروف وعن الولاد روحت ليه أعرف إيه الأسباب وأيه الغلط اللى غلطته،مراته التانية أهانتنى وطردتنى من بيتها،لجأت للمحكمة عشان أقدر أخد جزء من حقوقى”.
وحكمت المحكمة بالطلاق طلقة بائنة وإلزام الزوج بكافة النفقات.
