الكمبيوتر أفة تهدد استقرار الأسرة..سيدة تخلع زوجها

كتب -أسماء سرور

رفعت السيدة :”مها.م” 31 سنة دعوى خلع على زوجها بسبب إنشغاله الدائم بالجلوس على الكمبيوتر.

وقفت مها أمام محكمة الأسرة وقالت:” أنا متجوزة من 6 سنين وكانت حياتنا جميلة وربنا كرمنى ببنت كانت روح جوزى فيها وبيحب يقعد معاها وبيخرجنا وعايشين حياة طبيعية زى الناس لحد ما جت الكورونا وكله قعد فى البيت فى الوقت دة جوزى انشغل بالألعاب على الكمبيوتر كأنه لسه طفل، والموضوع اتطور أكتر وبقى يقضى طول الليل عليه ودة أثر فى شغله كتير”.

واضافت مها :”طبعا أهملنى وأهمل بنته وبيته لدرجة إنى قررت بلاش أطفال تانية لحد ما يرجع لطبيعته،كل دة ومش حاسس أن فى حاجة غلط بيعملها،وصل لمرحلة أن لو فى ضيف عندنا من أهلى أو من أهله يفتح الكمبيوتر ويلعب بقينا كل ما نتخانق أقوله أنت مدمن كومبيوتر أنا حاسة انك “متجوز الكمبيوتر”،كل دة مكنش بيغير حاجة بل بقى متعلق أكتر بيه لدرجة عملت قاعدة لأهلى وأهله وكلهم غلطوه وهو مغيب مش مستوعب أنه بيعمل حاجة غلط، زهقت خرجت أشتغل قولت بدل ما أنا فاضية وبعمل مشاكل الوضع بقى أسوء غير نظام شغله بقى يشتغل بليل ويقعد غفى البيت الصبح عشان يلعب براحته على الكمبيوتر وحياتنا الدمرت خالص، طلبت الطلاق قالى نعيش عشان البنت قولتله أنا كدة بدفن نفسى معاك رفض تماما الفكرة ملقتش تى حل غير الخلع”.

وقبلت المحكمة الدعوى ولم تصدر حكمها حتى الآن.