بئس الاختيار.. سيدة تشتكي ومولاتي ترد عليها
كتب- سارة منصور
ربما تكون نكبة الحياه اختيار خاطىء يعصف بالعمر ويضيع أجمل لحظات السنين، كحال المشكلة الاتية.
تقول السيدة “س.ص”: “انا زوجه تانيه بعد حب سنين، بحبه في صمت، اتعذبت في حبه لدرجه ان وصل بيه الحال اني ادخل مصحه نفسيه عشان مش عارفه انساه، وأخيرا ا تجوزته من شهور، لكن انا مش عارفه ايه حصلي، هو احنا اتجوزنا رسمي بس في السر”.
وتضيف: “هو بيجيلي يوم في الأسبوع ومش بيبات معايا، حسه اني علي الهامش وأن كل حياته مع بيته ومراته وشغله.بس هو راجل بمعني الكلمه، مش عارفه اعمل ايه بحبه حب جنون، بس مش حاسه بالاستقرار، والأمان”.
وتستكمل؛ “مش عارفه احيانا بندم علي حياه الاستقرار اللي كنت عايشاها مع جوزي الاول اني الغيره بتاكل قلبي، خايفه من فشلي”.
وتابعت:”هو إنسان كويس بس انا دايما اقوله انا حسه انك بتحب بيتك وشغلك وانا مخنوقة يقولي اصبري انا مشغول ومضغوط ماديا وأول ما اورق هفوق وهعلن وأنا بحبك اعمل ايه يا جماعه مع العلم احنا ناس محترمه جدا..أنا وهو تعليم عالي اصبر ولا غيرتي دي هتزيد”.
وتختتم “انا حاسه اني أعصابي ادمرت تخيلوا وهو في بيته الاولاني طول النهار مراقباه علي الفيس فتح أمتي ونام أمتي والغيره وأكله قلبي لغايه ما يقابلني يوم في الأسبوع، بس بصراحه راجل بمعني الكلمه يعرف ربنا وكل حاجه فيه حلوه استحمل ولا اعمل ايه “.
نصيحة مولاتي
عزيزتي .. استوقفني في رسالتك المليئة بالألم جملة ” راجل بمعنى الكلمة” .. ماذا تعرفين عن معنى الرجولة؟..الرجل هو من لا يعيش زواجًا ككذبة، من لا يكتب ورقة لزواج عرفي من أجل لقاء سريري مرة بالأسبوع وفتاه لا تنال من وقته سوى سويعات، من لا يعاشر زوجة وتأتمنه على حياه بأكمله ثم يلف ظهره ويتزوج من أخرى.
بئس الاختيار ألف مرة ولعلك تحتاجين فعلا إلى علاج نفسي يخلصك من عقدة التمسك بما لا تملكين.. وأسأل الله لكي الشفاء.
