جوزى بيخيرنى”أجيب الدهب من عند أختى أو يطلقنى “
كتب -أسماء سرور
أرسلت السيدة “م.ط” إلى مولاتى مشكلتها وقالت أنا سيدة متزوجة عندى 31 سنة وجوزى 42 ولد وحيد على أربع بنات والده متوفى وشايل مسئولية البيت.
وأضافت السيدة:” أتجوزت مع حماتى فى نفس الشقة وبابا قال “نوفر ليه ونلم عليه طالما شايل المسئولية ” وافقت ومتجوزة بقالى أكتر من عشر سنين وعندى ولدين ومن بعد جوزانا كان بيعمل جمعيات عشان يجوز أخواته البنات والحمد لله ربنا قدرنا وجوزنا 3 باقى واحدة مخطوبة ربنا يكمل ليها على خير”.
المسئولية
واستكملت السيدة بصراحة طول الوقت دة كان راجل وكان كل ما ربنا يكرمه وحد من أخواته البنات يتخطب يجيب ليا دهب يوم شبكتهم ويوم الفرح عشان تعبى وفرحتى بيهم وفعلا أنا كنت بفرح ليهم زى أخواتى وأكتر وربنا كرمنا واشترينا بيت كبير وبقى ليا شقة لوحدى الحمد لله .
واستطردت السيدة رسالتها وقالت:” أختى الكبيرة كلمتنى بعد وفاة والدتى وسألتنى عن دهبى قولتلها عندى فى البيت قالتلى “خبيه مفيش راجل ينفع يتأمن ليه وفضلت تكلمنى لحد ما أقتنعت وبالفعل وديت الدهب ليها ” وكان سر بينا اتفاجئت بأن جاى يتخانق معايا وبيسألنى عن الدهب وأن جوز أختى اللى قاله وأنا مستغربة بكلمها أسالها حسيت أنها مش متفاجىة زمتفقة مع جوزها ودلوقتى جوزى بيخيرنى بين الطلاق أو الدهب وبيقول ” إنى عبيطة وأختى ضحكت عليا ولو عاوز ياخده مكنش هيزوده” أنا مش عارفة أسمع كلام مين “.
ردت الإستشارية النفسية شيماء مصطفى وقالت أرى الحقيقة واضحة وضوح الشمس أختك وزوجها لا يريدون لك الخير مع زوجك وكونها تحرضك على إرسال الذهب دون معرفة زوجك ومن ناحية أخرى يزرع زوجها الشك فى قلب زوجك ناحيتك هذا هو مربط الفرس .
وأضافت أرى من رسالتك انك بالفعل شخصية طيبة تحبين زوجك وأهله وأرى المعروف بينكم فلا تخسرى هذا الإنسان الذى لم يبخل بالفعل عليك من كلامك .
سماع كلام زوجك
واستكملت مصطفى بالفعل عليك سماع كلام زوجك وإحضار الذهب وعدم التصرف دون إذنه بعد ذلك أعلم أنه يهدد بالطلاق وهذا خطأ ولكن هذا رد فعل غير محسوب يمكنك معاتبته عليه ولكن حافظى على بيتك وزوجك.
