“حقوق المرأة في المأوى مهددة”.. سيدة تُطالب بحقها في ملكية شقتها

كتب -أسماء سرور

أرسلت السيدة “ح.ك” إلى مولاتى مشكلتها/ وقالت:” أنا سيدة متزوجة عمرى 30 سنة وزوجى عمره 32 متزوجة من 8سنوات عن قصة حب كبيرة وعندى طفلين ولسه جوزى بيحبنى زى الأول وأكتر”.

وأضافت السيدة:” أنا مغتربة خارج مصر فى دولة عربية والمستوى المادى ممتاز وعندنا شقة كبيرة فى أحد المدن الجديدة جوزى مش حارمنى أنا والعيال خالص بالعكس دايما بيجيب هدايا فى مناسبات وغير مناسبات”.

تأمين المستقبل

واكملت السيدة، وقالت:” “كنت بكلم أختى قالتلى خلى جوزك يكتبلك الشقة زى ما جوزى كتبلى شقتنا وأمنت مستقبلى خليكى زيب متبقيش عبيطة”.

وقالت:” فكرت فى الموضوع وأول ما رجع جوزى من الشغل كلمته فى موضوع الشقة رفض وكان رده “انا مش حارمك من حاجة ولو لا قدر الله سيبنا بعض كل حقوقك هتاخديها ومصاريف عيالك هتوصل ليكى كاملة ،مش شقة اللى هتأمن مستقبلك رفضت طبعا وقولتله ياتكتب الشقة يانتطلق وساعتها هحرمك من العيال “هو دلوقتى مش بيكلمنى وساكت خالص أقنعه ازاى يكتب الشقة”.

أساس الزواج

ردت الإستشارية النفسية شيماء مصطفى وقالت لا تقارنى حياتك بحياة غيرك لأن ظروف أختك غير ظروفك وليس كل من يتكلم يتمنى لنا الخير حتى لو كان أقرب الناس إليك.

وأضافت مصطفى أرى أنك بعنادك هذا قد تخسرين زوجك المحب لك الذى لم تذكريه بأى صفه سيئة ،لماذا تبحثين عن ما يعكر صفو حياتكم ،لماذا تقحمبن أطفالك فى مشاكلك مع زوجك وتستخدميهم وسيلة تهديد؟.

واستطردت مصطفى أن الزواج ليس أساسه الأملاك والذهب ولكن أساسه الإحترام والحب والإحتواء أرجوك عودى إلى صوابك وحاولى إصلاح العلاقة مع زوجك مرة أخرى حتى لا تفسدى كل شئ.