خيانة عاطفية أم خلل في العادات؟.. سيدة تطلب طلاقًا للضرر بسبب “خطوبة صديقتها”!
كتب-اسماء سرور
رفعت السيدة “رشا. ح ” 35 سنة دعوى طلاق وتمكين من مسكن الزوجية على زوجها بسبب خيانته لها مع صديقتها.
وقفت رشا أمام محكمة الأسرة وقالت:” انا متجوزة من خمس سنين وعندى ولد وبنت اتجوزت جوزى راجل مطلق بدون أولاد وكان فى مشاكل كتير قبل الجواز وابوه كان مصمم على جوازه مني لانه كان بيحبنى، اتجوزنا فى شقة إيجار رفض أننا نتجوز فى شقته فى بيت ابوه عشان بيقول بتفكره بذكريات مش بيحبها، وكنت بشتغل معاه فى نفس الشركة ومعانا أصحابنا عارفين وفى واحدة منهم كانت قريبة منى لدرجة كانت بتبات عندى”.
وأضافت رشا :”سيبت الشغل وانشغلت مع ولادى لانى جبتهم ورا بعض، وصاحبتى جت فترة تبات عندى أيام ورا بعض وتطلب من جوزى يوصلها، مكنتش حاسه أنها ممكن تخونى ولكن للأسف العلاقة اتطورت بينها وبين جوزى لأنى الوقت ده كنت مشغولة مع حمايا كان تعبان وسيبت شقتى وعيشت معاه لحد ما توفى وأنا مش واخدة بالى من اللى بيحصل حواليه”.
وأكملت رشا:”بدأ جوزى يقصر فى مصاريف البيت ويتأخر برة وصاحبتى مبقتش تيجى عندى لحد ما جالى تليفون من واحدة تانية فى الشغل صاحبتنا بتقولى فى كلام أن فى علاقة بين جوزك والبنت التانية وفى مشروع خطوبة وللأسف طلع حقيقة سيبت البيت ليه وروحت قعدت فى شقة العيلة رفض يصرف على عياله، رفعت طلاق للضرر وتمكين من الشقة”.
وقبلت المحكمة الدعوى ولم تصدر حكمها حتى الآن.
