زوجة تخلع زوجها بسبب “لعبة بابجى”

كتب -أسماء سرور

رفعت السيدة “عائشة.ر “24 عاما خلع على زوجها بسبب إدمانه على الألعاب الإلكترونية وقضاء وقته كله عليها.

وقفت السيدة عائشة أمام محكمة الأسرة، وقالت:” أنا متزوجة من سنتين من جوزى كان بينا قصة حب كبيرة وكنت دايما بتخانق معاه بسبب عدم الإهتمام أيام الخطوبة والإرتباط لأنه كان دايما مشغول بالألعاب خاصة لعبة بابجى لدرجة أنه ممكن ياخد إذن من الشغل عشان يلعب مع أصحابه” .

وأضافت عائشة:”أنا كنت فاكره بعد الجواز هيتغير لاقيت أن الوضع بيسوء أكتر حتى لو تعبانة بيسيبنى أنزل مع ماما تكشف عليا لمجرد أنه يدخل “جيم ” ولما زعلت كان يجى يصالحنى عند أهلى ويقول أنه هيتغير ودة طبعا محصلش” .

وأكملت:” اللى خلانى أمشى المرة دى إنى سمعته بيكلم بنات وبيشتموا بعض بألفاظ صعبة طلبت منه يقفل المايك ويلعب بس رفض وقال “ملكيش دعوة ” زعلت وخدت جنب منه وقولت أكيد هيجى يصالحنى ،لاقيت بنتى الرضيعة تعبانة وسخنة جدا لدرجة أنها بدأت تتشنج جريت عليه أقول يقولى استمى أخلص الجيم ،اتصلت بأخويا جه خدنى ونزلنا بالبنت المستشفى واتحجزت فى المستشفى بسبب التشنجات وهو ولا يعرف حاجة عننا ،نام على اللعبة من كتر التعب وتانى يوم بيتصل طلبت منه الطلاق بسبب إستحالة العشرة مرة تانية رفض ،ورفضت السيدة أى محاولات صلح من المحكمة “.

قبلت المحكمة الدعوى وتم الخلع والطلاق طبقة بائنة .