سيدة ترفع طلاق للضرر ..تقول:”ضربنى فى عقيقة ابنى”
كتب -أسماء سرور
رفعت السيدة” فاطمة .م” 22 سنة على زوجها طلاق للضرر بسبب ضرب زوجها المبرح فى عقيقة أبنها.
وقفت السيدة فاطمة أمام المحكمة وقالت:” أنا متزوجة من سنة ومن ساعة ما اتجوزت وحماتى مسيطرة على البيت وعلى ابنها ومفيش حاجة بتيجى او تخرج من البيت إلا بإذنها هيا ومفيش حد ليه كلمة غيرها “.
وأضافت:” صممت حماتى تدبح عقيقة ابنى ومتعملش سبوع مع أنى كنت بحلم اعمل سبوع حلو ليه بس طبعا طالما هيا قالت لا تبقى لا وفعلا جوزى جاب عجل ودبحه وانا كنت تعبانة عشان ولدت قيصرى وكنت فى شقتى مقدرتش أنزل حماتى بعتت ليا أنزل أعمل الكبدة وناكلها قولتلها إنى تعبانة والولد محتاج يغير وامى وأخواتى وقرايبى كانوا فعلا بدأوا بالحضور مكنش ينفع أسيبهم” .
وأضافت:” فوجئت بيها بتتصل بيا بتقول “هتنزلى ولا أطلع أجيبك من شعرك هو أنتى فاكرة جبتى الولد خلاص بقى ليكى كلمة ” قعدت أعيط لاقيت جوزى طلع زى المجنون ضربنى علقة موت جرح القيصرى فتح وكسر إيدى وفى شهود على الكلام دة نزلت عملت محضر بالواقعة ورفعت طلاق للضرر”.
حكمت المحكمة بالطلاق طلقة بائنة وإلزام الزوج بكافة النفقات المترتبة على الطلاق.
