سيدة تطلب الخلع بسبب “البامبرز”

كتب -أسماء سرور

رفعت السيدة “دعاء ع” 22 سنة خلع على زوجها بسبب بخله الشديد ورفضه شراء بامبرز للرضيع.

وقفت دعاء أمام محكمة الأسرة، وقالت:” أنا متجوزة من سنة ونص طول السنة ونص دى شوفت منه بخل وقلة مصاريف كتير وكنت بمشى عشان كنت بشتغل لحد نص الحمل ومقدرتش فقعدت والفلوس اتصرفت على باقى شهور الحمل”.

وأضافت دعاء:” كانت امه بتشجعه أنه ميصرفش فى البيت ولا يجيب ليا اى حاجة حتى فى العيد كان يقول انتى لسه عروسة وعندك هدوم تشترى جديد ليه ،وكان فى المواسم يقولى اتصلى بأهلك خليهم يجيبوا الموسم ويجو مع أنه لما أهلى بيزورونى كان أخره كوباية الشاى وبس عمره ما قال أعمل غذا واضايفهم زى ما هما بيعملوا معانا كل دة وكنت بعدى وحتى لما غضبت من تصرفاته أهلى قالوا البيوت كلها مشاكل عيشى واستحملى ورجعت تانى” .

وأكملت” جت ساعة الولادة رفض يولدنى عند الدكتور اللى متابعة معاه وامه قالت كلنا ولدنا فى حكومى ،وفعلا روحت اولد فى مستشفى حكومى واتبهدلت جدا والحمد لله عدت وكان أهلى نقطونى جبت هدوم لأبنى وبامبرز ،خلص البامبرز طلبت يجيب قال زى ما أهلنا ربونا اعملى مع الولد رفضت وغضبت جدا لأن كنا فى الشتا حاولت افهمه أن كدة الولد يتعب رفض وقال كملى بقيت أجيب واحدة بس بليل وبمشى طول اليوم لحد ما الولد جاله إلتهاب رئوى واتحجز فى المستشفى طلبو بامبرز قال مش معايا فلوس كلمى أهلك ،ساعتها قررت إنى الإنسان دة انتهى من حياتى طلبت الطلاق رفض لجأت للخلع “.

وقبلت المحكمة الدعوى ولم تصدر حكمها حتى الآن.