سيدة تطلب الخلع بسبب “جلسات الليزر”
كتب -أسماء سرور
رفعت السيدة “ناريمان.م” 30 سنة على زوجها قضية خلع بسبب رفضه حقن الفيلر وجلسات الليزر.
وقفت ناريمان أمام محكمة الأسرة، وقالت:” أنا متزوجة من 4 سنين وجوزى كان كويس جدا معايا وبنحب بعض ومتفقين لحد ما حماتى ادخلت وهو اتغير معايا وبقى يرفض كل طلب ليا” .
وأضافت:” إحنا كنا متفقين إنى أبدأ عمل جلسات ليزر بعد ولادة ابنى التانى وفعلا روحت وبدأت أول جلستين لحد ما كانت أخت جوزى عندى وعرفت إنى بعمل قالت لحماتى والدنيا اتقلبت ،لاقيت حماتى بتكلمنى أن مينفعش أعمل ليزر وكدة غلط وكلام كتير قولتله إنى متفقة مع جوزى وخلاص أنا بدأت فعلا قالت الكلام دة لازم ينتهى رفضت طبعا تدخلها وتحكمها فيا “.
وأكملت:” طبعا تحدثت مع جوزى ومحصلش منه أى اعتراض قولت كويس ،لحد ميعاد الجلسة لاقيته بيقول مفيش جلسات وكفاية اللى عملتيه حاولت أفهمه ان مينفعش رفض وقال دة أخر كلام ،غضبت عند أهلى وسيبت البيت لاقيته هو اللى بيهددنى لو مرجعتش يبقة هيتجوز عليا رفضت أسلوبه معايا وتأكدت من إستحالة العشرة بينا ورفعت خلع”.
قبلت المحكمة الدعوى ولم تصدر حكمها حتى الآن.
