سيدة تطلب الطلاق للضرر.. كلمة السر “الحمل”

كتب -أسماء سرور

رفعت السيدة “ريتاج .و” 27 سنة دعوى خلع على زوجها بسبب رفضه إنجاب أطفال منها.

وقفت ريتاج أمام المحكمة، وقالت:” أنا متجوزة من 4 سنين جوزى من أول ما اتجوزنا وهو رافض تماما ان يكون فى أطفال بيقول “مش بحبهم ومش عاوز نكد” مع أنه حنين أوى مع ولاد اخواته وأصحابه وبيحيب هدايا ليهم” .

وأضافت :”فى أول سنة مكنش فارق معايا خصوصا أنه كريم وكويس معايا وبيخرجنى وبنسافر بره،ودايما يبعت هدايا كتير لأهلى فى المناسبات وغير المناسبات ،وأنا جاب ليا دهب كتير طول الوقت يقولى اختارى اى حاجة نفسك فيها وده اللى كان مخلينى ساكتة عن موضوع الحمل”.

وأكملت:” صاحبتى كلمتنى وقالت فى دكتورة كويسة لو فى مشكلة عندك فى الحمل وهاتى عيال وانتى صغيرة عشان تربيهم وفعلا كان عدى على جوازنا اكتر 3 سنين ونص وقولت كفاية أنا محتاجة طفل ساعتها أهلى عارضونى لأنهم بيستفيدوا منه وانا صممت وقررت اخد منشط عشان احمل بسرعةمن غير ما يعرف وفعلا حملت أول ما عرف اتبدل شخص تانى بقى كل حاجة زعيق وخناق ويقول مش طايقك ولا طايق اللى فى بطنك كنت حامل لسه فى أول شهر وطلب منى أنزله رفضت قال خلاص أختارى ما بينى وبين الطفل قولتله هتختار الطفل ،قال خلاص روحى لأهلك ومفيش ليكى أى حقوق عندى ومش هصرف عليه ولا هسجله ،لجأت لرفع طلاق للضرر بسبب تمسكى بحلمى الأمومة “.

وحكمت المحكمة بالطلاق طلقة بائنة وإلزام الزوج بكافة النفقات المترتبة على الطلاق.