سيدة تطلب الطلاق للضرر..كلمة السر “حماتها”
كتب -أسماء سرور
رفعت السيدة “فاطمة.م” 33 سنة دعوى طلاق للضرر على زوجها بسبب تحكم حماتها فى كل شئ.
وقفت فاطمة أمام محكمة الأسرة وقالت:” انا متزوجة من 6 سنين وعندى ولد واحد بس وكانت علاقتى بجوزى كويسة جدا وكنا متفاهمين وظروف حياتنا كانت ماشية على الأد بالظبط وكنت عايشة معاه ومبسوطة”.
وأضافت فاطمة:” أمى طلع ليها ورث قررت توزعه علينا وكان جوزى حاضر موضوع الورث وحق أمى وأنها قررت تدى لكل بنت عشرين ألف تجيب حاجة دهب لنفسها وكنا فرحانين وابنى كان نفسه فى مصيف قولت الحمد لله ربنا فرجها وجوزى كان موافق وبدأنا نشوف الأماكن اللى هنخرج فيها لحد ما حكى لحماتى قالت لا مفيش مصيف وهاتو خروف ولا جدى صغير نلم بيه بناتى وندخل عليهم بموسم حلو ساعتها أنا زعلت وقولتلها ابنى نفسه يروح يصيف زى ولاد عمه وولاد خاله قالت انا قولت مفيش مصيف ،للأسف سخنت جوزى وفهمته إنى بحوش من غير ما يعرف وإنى بسرقه وهو صدق وطلع أخد كل الفلوس ولما أعترضت ضربنى وبهدلنى ،غضبت عندى أهلى وأمى وأخواتى كلموه وهو مش مصدق غير كلام أمه ورافض الصلح أو الطلاق أو حتى يبعت مصاريف لإبنه “.
وحكمت المحكمة بالطلاق طلقة بائنة وإلزام الزوج بكافة النفقات المترتبة على الطلاق .
